Mizoram State Health Care Society (MSHCS) Governing Body chuan vawiin khan Chief Minister Office Conference Hall-ah Chairman Pu Lal Thanhawla, Chief Minister hovin meeting vawi 8-na an nei.

Meeting-ah hian MSHCS leh RSBY ( Rashtriya Swasthya Birna Yojana) nen kalkawpin, a inrelbawlna kengkawh turin Third Party Administrator (TPA) thuhmun leh Insurance Company thuhmun bawk hmang kawp se an ti a. RSBY hi central sorkar scheme, BPL chhungkua in damlo an inenkawl nan cheng singthum thleng a thlawna an dawn theihna a ni a. MSHCS hi a in enkawl ve na atan engemaw chen alo phuhruk theih nan, a scheme hnuaiah hian a hmingin BPL chhungkaw khatin kum khat chhung atan cheng za sengin a scheme  (premium) hi an lei a ngai ang a, chu chuan  cheng nuai khat thleng senso MSHCS hian a thlawnin damlohna a enkawl sak ang a. Hetih lai hian Above Poverty Line (APL) chhungkuate tan cheng nuai khat dawng ve turin premium cheng 500 a a lei angai ve thung dawn a ni. Damlohna khirhkhan bikah chuan cheng nuai thum thleng an dawng thei ang. He Health Care Scheme hi kumin July ni 1 atang khian hman tan tum a ni.

MSHCS ah hian Chief Minister chu Chairman a ni a, Health Minister chu Co- Chairman leh Chief Secretary chu Vice Chairman a ni. Member Secretary ah Health Secretary a ni bawk. Member dangte pawh an nihna a ruat an ni. Chutiangin, Secretaries to GOM, Finance, RD, UD & PA, Law & Judicial Department te, Director of Health Services, Director of Hospital & Medical Education leh non official member atan, President te - Central YMA, MUP leh MHIP te an ni bawk.