Mizoram State Law Commission Meeting Vawi 18-na chu vawiin chawhnu dar 2:00 khan an Chairman, Pu R. Lalrinawma, MLA hoin a Office Chamber-ah an thukhawm.

He Meeting-ah hian meeting hmasa-a thurel - The Mizo Marriage Bill, 2013 leh The Mizo Inheritance Bill. 2013, Pu R.C. Thanga Draft leh The Mizo Divorce Bill, 2013, Pu Zahmingthanga Ralte Draft chu thlirho niin, siam rem ngaite siam rem a ni a. Heng Bill te hi zau zawk a sawihona (Seminar/ Consultation) neih tura ruahman niin, chumi hnuah Assembly-ah put luh tura chhawpchhuah a ni ang.

Chairman, Pu R. Lalrinawma, MLA chuan heng Bill-te hi Mizo chhungkaw tin tana pawimawh a ni a. A bikin Mizo Hmeichhiate dinhmun chawikanna leh siamthatna tur a ni. Sorkar pawhin a ngai pawimawh hie a. Fimkhur a ngaih avangin duh anga hma-ah chhawpchhuah theih a ni lo va, tunah peih fel a lo ni ta hi a lawm awm a. A hma thei anga heng Dan pawimawh te hi kan neih a tul, tiin a sawi bawk.

Vawiin meeting-ah hian Pu R. Lalrinawma, MLA, Chairman bakah Pu Zahmingthanga Ralte, Member-Secretary, Pu P. Singthanga, Secretary, Law & Judicial Department, Pu A.K. Rokhum, Additional Advocate General, Pu R.C. Thanga, Special Public Prosecutor-cum-Government Advocate, Pi Marli Vankung, Additional District & Session Judge, Aizawl, Pu L.H. Lianhrima, Advocate leh Pu Michael Zothankhuma, Sr. Advocate te an tel a ni.