2534/2024-2025

Aizawl dated 15th October 2024: Vawiin khan Planning & Program Implementation Department Conference Hall, Aizawlah Mizoram State Policy Coordination Committee Review Meeting tum khatna neih a ni a. Pu KC Lalmalsawmzauva, Adviser to Chief Minister, Vice Chairman, MSPCC ni bawk chuan hun kaihruaiin 'Bana Kaih Scheme' kalpuitu tur department 16 atangin Nodal Officer leh Assistant nodal officer-te an tel a. Thutkhawmna a tarlan danin Bana kaih scheme portal kaltlang hian dilna 1314 a lut tawh a ni.

Pu KC Lalmalsawmzauva, Vice Chairman chuan Bana kaih scheme-a dilna lut tawhte chu uluk tak a zirchiang a, hlawhtlin ngei tum a theihna neite, tih tak takna nen a beih tumten an mamawh ang tanpuina an hmuh ngei theih nan Nodal Department-a thawktute chu hma la turin a fuih a. Dilna theh luh kawng a hriatchian duh leh harsatna neite chu kaihruai a, theihtawp a pui zel turin Nodal Officer kalkhawmte chu a chah bawk a ni.

Pu Lalmalsawma Pachuau, Secretary, Planning & Program Implementation Department chuan Bana kaih scheme portal-a dilna lut batch hmasa ber chu Nodal officer-ten an thlitfim hnu ah November ni 21 ah Apex body-in endik leh hman tur a ruahman a nih thu a sawi a. Kumin November thla chhung vek hian Progress Partner tur a thlanchhahte chu tihfel hman tura ruahman niin Training-te pek an ni ang a. December thla chhungin a viltu department ten Progress partner-te loan dilna tur an buaipui sak ang a, kum 2025 January thla chhung hian Progress partner-te hian hma la tan thei tawh tur a beisei a nih thu a tarlang a. Progress Partner thlanchhuahna hi thla tin neih chhunzawm tawh tur a ruahman a nih thu a sawi.

Thutkhawm ah hian Bana Kaih scheme portal kaltlangin vawiin thleng khan dilna 1314 lut a awm tawh thu tarlan a ni a. Commerce & Industries Department hnuai ah dilna lut tam berin, 540-a lut tawh a, Animal Husbandry & Veterinary Department hnuai ah 409-a lut tawh bawk a ni. Dilna lut zing a 1292 chu mimal ang a dilna a ni a, 22-te chu pawl ang a dilna a ni. Vawiin thleng a Nodal Department-te hmalakna sawiho a nih bak ah dilna thehluhna dik lo leh Trade siam rem ngaite sawiho a ni a. Dilna thehluttute tan a awlsam zawk nan Bana kaih scheme portal siamthat ngaite sawi a ni bawk.