4448/2025-2026

Champhai, dated 12th February 2026 : Nimin khan Mizoram State Project Monitoring Committe Inspection team te chuan Champhai District chhunga hmasawnna hnathawh hrang hrangte a hmung kalin an enfiah.

Inspection Team te hian Champhai khawpui chhunga building leh a kaihhnawih 6 sak mek te an tlawh a, a sakna tura bungraw that leh that loh test result an check sakin bungraw mamawh chhek khawl dan te an enfiah nghal a. A saktute chu bungraw mamawhte fur ruahtui tlak hmaa la khawl turin an chah a ni.

An tlawh zinga mi Working Women Hostel, cheng vaiblechhe 13.66 senga sak tur chu a hmunah buaina a awm avang leh hall hlui thiah a nih avangin a hun taka hna thawh theih a nih loh thu te, tunah ban khur laiin ban a tun mai theih tura peihfel a nih thu te an tarlang a.

Kum 2023 a sak tan tawh, nikum September thlaa zawhfel tawh tur Hostel for ST Girls chu fund kalna, Article 275 atangin nikum working season tawp rual velin fund rawn kal a awm theih loh avangin chawlhsan a nih thu te, hna hi zaa 87 zawhfel tawh a nih thu te an tarlang tel bawk a. Hei bakah hian Champhai Bethel Venga Auditorium sakna, MDoNER atanga cheng vaibelchhe 12.95 senga sak mek chu kumin December thlaa zawhfel hman beisei a nih thu te, hna zaa 56 vel zofel tawhin a sakna bungraw mamawh chhek khawl sa a nih bakah lak belh mek zel a ni tih an tarlang a.

Champhai District Hospital-a Critical Care Block sak mek chu a hna zaa 91 vel zo tawhin a satute chu hna quality tichhe chuang loa a hun tak, kumin September thlaa zo hman turin an chah a. Hnathawktu inlak belh a tul nia an hriat thu an tarlang a. Cheng vaibelchhe 38.79 senga Champhai District Court Complex sak pawh hna zaa 73 vel zawh a ni tawh a. Hna chhe chuang lova a sak zawh hun tur, kumin September thlaa zo hman turin a satute an chah ve bawk.

Hei bakah hian District Jail thawmthat hna, SASCI atanga cheng vaibelchhe 8.26 senga thawh mek an tlawh a. Hna hi zaa 30 vel an zo tawh a, fencing pawh zaa 20 vel zawh a ni tawh bawk a. Jail a nih avangin hna khawih lai hian fimkhur tak leh chak tak sia thawh a tul thu te, hna hi a hun tak, kumin April thlaa zawh tum turin hnathawktute an chah bawk a ni.