No.7137/2020-2021
Mizoram State Road Safety Council chu an Chairman Pu TJ Lalnuntluanga, Minister of State, Transport Department hovin vawiin chawhma khan Transport Directorate Conference Hall-ah Road Safety Month hman dan tur ngaihtuahin an thukhawm.
Meeting kaihruaitu Pu TJ Lalnuntluanga chuan kum dangah chuan January thla ah Road safety Week hman thin a ni a. Kuminah erawh chuan sawrkar laipuia Road Transport & Highways chuan thla khat daih Road Safety Month January ni 18, 2021 - February ni 17, 2021 inkara hman turin ruahmanna a rawn siam a ni, a ti a. India ramah kumtin mi nuai khat leh singnga vel lirthei chetsualna avangin an boral ziah anga chhut a ni a, lirthei chetsualna avang hian mihring nunna hlu tak kan chan thin bakah, ramtui lei lovin mi tam tak an awm a, chhungkaw tam takin eizawnna thlengin harsatna an tawh phah thin a, Mizoramah pawh lirthei a pung chak em em a, hetih lai hian lirthei khalhtu, lirthei neitute leh mipuiten fimkhurna tur leh zawm tur kan neihte kan hriatchian a tul hle a, Road safety Month hman chhung hian nasa lehzuala inzirtirna kalpui a tul takzet a ni, a ti.
Vawiin thukhawm chuan sawrkar laipui ruahmanna zawmin January ni 18, 2021 - February ni 17, 2021 inkarah Road Safety Month hman ve nise an ti a, Road Safety Month hawnna inkhawm chu district headquarters zawng zawngah huaihawt tur a ni ang. Mipuite tanpui nan leh an hriat duh zawngte hrilhhriatna tur Help & Guidance Desk siam tum a ni a, Transport Department leh Traffic Police tangkawpin district khawpui zawng zawnga hmun lun laiah Help & Guidance Desk hi an buatsaih ang.
Mipuite fimkhur tura zirtirna atan Road Safety banner chu district khawpui kawtchhuah leh kawtthler hmun hrang hrangah tar a ni ang a, lirthei zuartuten an dawrah an tar bawk ang. Zirna In hawn a nih hunah lirthei laka fimkhur tura intiamna (Road Safety Pledge) chham tur a ni ang a, sawrkar pisa zawng zawngah pawh chham tur a ni ang.
Local Council leh village Council ten an huam chhungah Road Safety Month hman chhung hian vantlang aurinna hmangin mipuite fimkhur tura hriattirna thuchah tawi an puang thin ang a, mipuite hnenah sem tur Road Safety Pamphlet leh Leaflet siam a ni bawk ang. Hei bakah hian Insurance Company leh pollution Control Board ten insurance pawimawhna leh pollution chungchanga mipuite hriattur pawimawh an buatsaih chu mipuite hnenah sem chhuah a ni bawk ang.
Road Safety Month thuchah Transport Minister-in a sawi leh lirthei chetsualna laka mipuite himna tur leh hemi chungchanga zawm tur pawimawh chi hrang hrang inhrilhfiahna "Road Safety Talk Show" buatsaih tum a ni bawk.
