Vawiin khan Mizoram State Tobacco Control Society meeting vawi 7-na chu an Chairman Pi M. Zohmingthangi, IAS, Secretary, Health & Family Welfare Office Chamber-ah neih a ni a, member te an kal tha hle.

Mizorama vaihlo leh a kaihhnawihte avanga Mizote hriselna nasa taka tihchhiat a nih avangin, Mizoram chu Meizu awm lohna State ni tura hmalakna beihpui thlak mek zel a ni a. Meizuk mai bakah vaihlo avanga harsatna tam tak thlentu- tuibur hmuam te, sahdah leh khaini hmuam hluarna ber State kan nih avangin India leh khawvela ber kan hauhna chu Cancer tamah a nih avangin, mipui mimirten meizuk sim a, kan hriselna tihthat tulzia te, meizuk sim thei lote pawhin zuk tlem deuh an zir  theihna turin kum tam tak zirtirna pek a lo ni tawh a. Kum hnih kalta chhunga hmalakna thlir letin, sorkar puihna leh mipuite thuawihna avangin nasa takin hma kan sawn a, lawmawm an ti hle.

Tun July atang hian hma thar lakna tur ‘Boomberg Initiative to Reduce Tobacco Use in Mizoram,’ tih Programme duan a ni a. Hei hian Mizoram pum, thingtlang  pawh huap vekin, Vaihlo lam chi tihrem tumna kawnga hmalakna tur a ni a. Hemi kawngah hian khaw tina YMA te, MHIP te, Kohhran hote pawhin nasa taka hma lo lakpui turin an beisei. Mizote hi thil intihhmuh chi kan nih avangin, YMA leh Kohhranten theih tawp chhuaha hma an lak phawt chuan a sawt hle ang tih an beisei tlat a ni.

Damdawi in chhunga inthiarna (Toilet) chhungah meizuk ruk a hluar hle tih hriat a ni a; hemi lama hmalakna atan Damdawi ina awm Dam lo te, anmahni kantu te, awmpuitute pawh fimkhur turin State Tobacco Control Society chuan a ngen a. Damdawi in zawng zawngah hma lo la thar se, Toilet chhunga meizuk rim na tak mai awm thin hi tihbo tum theuh turin tanlak thar tul hlein an hria. Office Compound leh Motor- Bus, Sumo, Taxi-ah te pawh Driver leh passenger ten meizuk khap tlat a ni a, zawm theuh turin Committee chuan a ngen a ni.

Mizote kan hrisel a, kan damrei theih nan doctor leh mi thahnemngaite hmalakna hi thlawp  theuh turin mitin an sawm bawk.

Vawiina State Tobacco Control Society thukhawm hi Chairman tharin a ho hmasak ber a ni a, chak taka hmalak zel an tum a ni.