Vawiin khan Mizoram State Sprorts Council chuan Aijal Club ah General Body Meeting a nei. He meeting hi Sports and Youth Services Minister Pu Zodintluanga chuanin Ex-officio President a nih angin a kaihruai a. Tin, Pu R. Lalvena IAS (Secretary, SYS); Pu Lalzirmawia Chhangte, (Director, SYS); Pu Lalrinawma (Joint Secretary, SYS); Pu F. Rotluanga (Vice President, MSSC) leh Pu C. Laltlanthanga (Secretary, MSSC) te an tel bawk.

Minister chuanin thuhma sawiin, MSSC hnuaia Sports Association hrang hrang 32 awm te hmalakna leh hlawhtlinnate a tarlang a. Infiamna lama hmasawnna tura Sorkar laipui bultum, Urban Sports Infrastructure Scheme (USIS) pawh 2012 a din tan anih ruala Mizoram Sports Department-in rang taka an bawhzuina zarah, state lian zawk ten he Scheme atanga fund sawichhuah engmah an neih hmain Mizoram chu India rama hlawhtlinna hmu hmasa ber niin, ram pum huapah pawh Astro Turf khelmual peih hmasa ber a ni thei a ni a ti.

Sorkar laipuiin District tina school tan sports ruangam tha – playground, gymnasium leh a dangte, sports lama hmasawn zawkna tur atan siam theih ni se a tihna kawngah pawh hma kan la zel a. Central in a duh ang thlapa a duan sa (acre 25 aia tlemlo) anga hmun remchang hmuh mai a hrasa nachungin, Thenzawl leh Bilkhawthlir ah te hmun tha tak hual lawk tawh anih zia a tarlang a. “Sorkar laipui atanga lo chhuak tui hna hi State dang zawngte thal khalh turin Mizoram chu a inpeih tawh”, Pu Zodintluanga chuan ati bawk.

Sports Minister chuan Sport Association hrang hrang hmalakna tlangpui a tarlang bawk a. Athletics lama tan lak leh zual a tul thute, Lammual gallery peihfel leh cheibawl hna thawh mek dan te, Mizoram in Vision 2016 Policy chak taka a kalpui thu leh Catch Them Young Programme hnuaia infiamna hrang hranga infiammi duhawm tak chherchhuah mek an nih thu sawiin, he programme hmang hian hun reilote chhungin ram pum huap ah kan chungnun theih a beisei thu a sawi.

MSSC Secretary Pu. C. Laltlanthanga pawhin infiamna hmunhma tih phuisui kawng leh infiammi te dawmkan kawnga Council hmalakna tlangpui a sawi bawk.

Vawiina Mizoram State Sports Council General Body Meeting hian kum 2013-2014 Budget Rs.1401.20 lakhs a passed a ni.