Kochi, Kerala, Rajiv Gandhi Indoor Stadium-a tun thla ni 14 - 15 chhunga International Okinawan Shorin Ryu Seibukan Karate Do of India leh Regional Sports Centre, Kadavanthara, Kochi tangkawp buatsaih a 3rd RSC National Karate & Kobudo Championship, 2012 neih zawh taka Mizoram aiawha kal Champhai District Karate Association in an thlanchhuah Karate Player 8 te chuan Gold Medal - 3, Silver Medal - 3 leh Bronze Medal - 1 la in Mizoram panin an lo haw chho mek.

Mizoram aiawha kal Champhai Karate team hi an coach Lenghmingthanga leh Manager Lalneihthari Tlaisun te nen Kochi pan hian tun thla, August ni 6, 2012 khan Champhai an chhuahsan a, Kochi-ah hian inelna nei zovin Inrinni zan khan Mizoram lam panin an lo haw chho a. Vawiin chawhnu lam khan Guwahati rawn thlengin, tlai lam khan Mizoram panin an rawn haw chho zui leh nghal a ni. Mizoram sorkar Sports Council sum hmanga Mizoram aiawha National Level inelna a tel, Champhai Karate Team te hian medal 7 an la a. Mizoram tana hlawhtlinna ropui tak an dawn theihna kawngah Mizoram sorkar leh mipuite chungah lawmthu an sawi tak meuh meuh a ni.

Champhai Player te hi semi final chinah anmahni an intum kual avangin beisei angin medal an la tam thei ta lo a. He inelna ah hian India ram state 13 atangin Karate Player 480 an tel a ni. Ruahman lawk ang chuan naktuk chawhma lam hian Aizawl rawn thleng chhovin, Aizawl ah zan an riak ang a, ni 23 August zingah Champhai panin an haw chho ang. Champhai ah hian District Sports Committee kaihhruaiin anmahni lo hmuahna hun ropui thei ang bera buatsaih tum niin, he hunah hian Champhai DC Pu Vijay Kumar Bidhuri chu khuallian tura beisei a ni.

Mizoram aiawha National Level a kal te leh medal dawngtute bakah an medal lakte chu : H. Lalruatdiki d/o H. Sangdawngliana, Venglai - Gold Medal ; C. Lalthlanawma s/o C. Lalthlamuana, Zotlang - Gold Medal ; Joseph Malsawmdawngliana s/o Lalhmingthanga, Zion Veng - Gold Medal ; Timothy R. Lalhruaihlua s/o C. Lalrinsanga, Vengthlang - Silver Medal ; R. Malsawmkima s/o Lalrinpuia, Kahrawt- Silver Medal ; Zodintluanga s/o H.T. Khupa, Bethel Veng - Silver Medal ; Lalbiaksanga s/o Lalvunga, Kanan Veng - Bronze Medal ; Zohmangaihsangi d/o Challianthanga, Bethel.