Ni 28, September 2018 khan Hotel Ritz, Aizawl ah MYC Chairman Pu Joseph Lalhimpuia’n Pu Prateek Bhattacharya, National Sales Head, Alternative Learning Systems (ALS) hnenah Rs. 1.593 Crore a hlan a, hei hi MYC hnuaia UPSC, IIT-JEE/NEET a zirlai zir mek te zirna fees MYC in a tum sak chin a ni. Hemi bakah hian Youth Commission chuan VSAT (Very Small Aperture Terminal) New Delhi atanga Coaching Centre tin a Online a pek chhuahna khawl lei nan leh classroom maintenance leh Installation Charge  atan cheng engemaw zah alo seng tawh bawk. He Cheque inhlanna hunah hian ALS leh MYC thawh hona a Centre hrang hrang senso phuhruk nan Rs 32.12 lakhs ALS chuan MYC hnenah a hlan ve bawk.

MYC Chairman Pu Joseph Lalhimpuia chuan Central service, Doctor leh Engineer-ahte kan Mizo thalai tam zawk kan inziah tlin theih nana Mizoram Youth Commission hma lakna leh sum senso hi a theuneulo hle mai a, State dangte senso ai pawhin a sang a ni, a ti a, hetiang taka thalaite hmakhua ngaitu Sawrkar kan nei hi kan vanneih hle a ni tiin  India ram chhunga zirna tha ber berte kan thalaiten an dawn ve theihna turin MYC in kan chhawpchhuah sak tawh a, heti hi chuan kan thalai leh zirlaite kovah mawhphurhna a innghat thui hle a ni, a ti bawk.

Pu Prateek Bhattacharya chuan ALS hi India a coaching centre tha ber a chhal ngam a ni a, Mizoram Youth Commission hmalakna avanga Mizo thalai hlawtling tura bei ngam ten ALS zirtirna a tlawm zawkin an dawng  thei hi a lawmawm hle a ni, a ti a, tun atanga hun reiloteah chuan Mizoram hian a hlawhtlinna kan hmuh thuai ka beisei a ni, a ti.

MYC Coaching centre Aizawl leh Lunglei a IAS coaching kal mek thalai 131 an awm a, IIT-JEE & NEET coaching hi school 7 ah kalpui mek niin zirlai 396 an kal mek bawk a ni.