Vawiin khan Trade & Commerce Minister Pu Lalrinliana Sailo in naktip July ni 22 mai a Mizoram Trade & Investment Conclave 2009 Mizoram sorkarin Aizawl Berawtlang a a thlenna tur inbuatsaihna a hmunah a enpui a. Inbuatsaihna a kaltluangin lungawithlak a ti. Tarlan tawh thin angin he Mizoram Trade & Investment Conclave 2009 hi Indian Chamber of Commerce leh Mizoram Sorkar a Trade & Commerce Department te buatsaih a ni a. He hunah hian Myanmar leh Bangladesh atangin mikhual pawimawh tak takte an rawn tel dawn a ni.

Hawnna inkhawm hi Berawtlang a Tourism Complex ah chawhma dar 9:30 ah tan a ni ang a. Mikhual lawmna thu Pu M.K.Saharia, Chairman, North East Initiative, Indian Chamber of Commerce in a sawi ang a. Key note address Pu Lalrinliana Sailo, Minister Trade & Commerce, Mizoram in a sawi ang. Pu U.K.Sangma, IAS, Secretary, North Eastern Council te, Dr.Md.Omar Faruqe, First Secretary-Commercial. Dy.High Commission of Bangladesh te, His Exellency Mr.Sein Oo, Consul General of the Union of Myanmar ten thu an sawi bakah  Pu Lal Thanhawla, Chief Minister hawnna thu sawiin Exhibition a hawng nghal ang.

Exhibition ah hian  Stall 20 siamin Mizoram a Pangpar chi hrang hrang te, Grape leh Iskut te, Handloom, Handicrafts, Bamboo and Sericulture products te, Mizoram thar Sapthei, Thingpui leh Sawhthing, Aieng etc.. te phochhuah a ni ang a. Myanmar leh Bangladesh te tan House te pawh ruahman sak an ni bawk ang.

He Mizoram Trade & Investment Conclave 2009 ah hian mikhual pawimawh tak tak ram chhung leh ram pawn atangin an rawn tel dawn a. Chawhnu lamah Business Session leh Myanmar leh Bangladesh te nena in sumdawn tawnna lam hawi sawihona hun zau tak neih a ni dawn a. He hunah hian Mikhual pawimawh tak takte bakah Pu H.Liansailova, Agriculture Minister leh Pu S.Hiato, Industries Minister te pawhin thu an sawi dawn a ni. Thlahna thu Pu Vanhela Pachuau, IAS, Chief Secretary in a sawi ang a, lawmthu Pi Esther Ruatkimi, IRS, Secretary-Trade & Commerce in a sawi ang. Zan lamah mikhualte pual hian zanriah buatsaih sakin Cultural Programme pawh ruahman sak an ni ang.