Mizoram sorkar leh UN Agency te thawh hona turah hmalakna tur chhawp chhuahte zirchiang turin UN Technical Mission Team chuan kar leh Thawhtan Ni, May ni 5 khian Mizoram an rawn lut dawn a. Technical Mission team ah hian FAO atangin mi 3; ILO, UNDP leh UNIDO atangin mi 2 theuh, an zavaiin mi 9 an lo kal dawn a ni.
UN Mission Project hnuaia Mizoram tana hmalakna tur chungchang ah hian April ni 21 khan India rama UN Coordinator Lise Grande hovin UN Agency hrang hrang te leh Mizoram sorkar aiawhin State Planning Board Member & Secretary, Pu P.L.Thanga, NLUP Implementing Board Vice Chairman & CEO ni bawk te chuan UN House, New Delhi ah sawihona an nei a. Mizoram project siam tura Technical Expert member thlan dan tur sawiho a ni a.
Mizoram tana UN Team te hmalakna hi India ramah UN Mission Project anga ;kalpui hmasak ber tur a la ni a. Mizoram UN project chungchang sawihona hi Planning Commission member Pu B.K.Chaturvedi hovin April ni 28 khan Planning Commission ah neih niin he meeting ah hian UN Coordinator leh UN Agency hrang hrang te, Planning Commission a mi pawimawh te bakah Mizoram State Planning Member & Secretary leh Resident Commissioner te an tel a. He project buatsaihna atana UN Agency a sum awmsa baka sum mamawh te chu Planning Commission in a tul angin a tum dawn a ni.
UN Technical Mission team te hian Mizoram an rawn thlenin sorkar department hrang hrang hotute nen hmalakna tur an sawi ho ang a. May ni 6 ah Chief Minister an hmu bawk ang. An cham chhungin district hrang hrang an tlawh kual dawn a. May thla chhungin Mizoram lama buaipui ngaite ching felin Mizoram tana UN Mission project ruahmanna hi June thla chhungin peih fel hman tum a ni.
