Mizoram Veterinary Service Association (MVSA) chuan vawiin khan Tourist Lodge, Chaltlang-ah General Conference vawi 28-na an hmang a, Parliamentary Secretary Pu Lal Thanzara chu khuallian niin State Planning Board Member-Secretary Pu P.L. Thanga chu Khual Zahawm a ni. Vawiin Conference hawnna inkhawmah hian Indian Society of Veterinary Pharmacology & Texicology atangin award ropui tak ‘INTAS PHARMA YOUNG SCIENTIST AWARD’ dawngtu Dr. Gracia Lalchamzuali, Veterinary Officer South Vanlaiphai hnenah khuallian chuan lawmpuina leh chawimawina Certificate a hlan a ni.
Parliamentary Secretary Pu Lal Thanzara chuan Mizoram chu sa, artui leh bawnghnute ah nasa takin kan intodelh mek hi AH&Vety Department te hmalakna leh thawhrimna vang a ni, a ti. Mumal taka ran enkawl hi Europe ram atanga tan a ni a, kum 1762-1821 inkar khan Veterinary Doctor mithiam rual hmasa ber an pass chhuak nghe nghe a; tunah chuan Mizote ngei pawh ransate duat leh enkawlna chang kan hre tawh hi a lawmawm a ni, a ti bawk. Tunlaiah ran natna hrang hrang hriat thar a ni zel a, amaherawhchu Mizoten kan la tuar em em lohna chhan pawh AH&Vety Department te taimakna leh an hnaa an inpek zawhna vang a ni tiin Pu Lal Thanzara chuan chhungkaw tam tak te tihlimtu leh thlamuantu an nihna hre rengin an hnaah thahnemngai takin thawk zel turin a chah a ni.
Khual zahawm Pu P.L. Thanga pawhin thu sawiin sorkar programme pawimawh tak NLUP hlawhtlinna kawngah AH & Vety Department ten an mawhphurhna an kengkawh that leh kawng engkimah sorkar an thlawp that avangin lawmthu a sawi a. Project reng reng monitoring hle thei lo hi a kal fuh thei ngai lova chuvangin NLUP hnuaia ranvulh thlang chhungkaw sing khat dawn laite chu hneh taka vila, anmahni zirtir leh tanpui turin theihtawp chhuah zel turin MVSA member te a chah bawk.
AH&Vety Director Pu L.B. Sailo chuan Department hmasawnna leh hmachhawp hrang hrang te a tarlang a; vawk vulh, ar vulh leh bawnghnute dehchhuah kawngah nasa takin kan intodelh tawh thu a sawi a ni. Department hmachhawp zinga langsar zual - Aizawl-ah ran damdawiin lian, Thenzawl-ah ranchaw siamna leh Mualpui hmuna ran talhna in (slaughter house) te chu sorkar hmalaknain chak taka kalpui mek a nih thu a sawi a. Kum kalta chhungah ran natna ‘foot & mouth disease’ ( ran ke na), ar pul leh swine fever te pawh department hmalakna avangin tih tawp / tih tlem a nih tawh thu a tarlang bawk a ni.
MVSA-ah hian member 111 leh honorary member 6 an awm mek a. Ni hnih awh tur he Conference agenda pawimawh te zingah MVSA Constitution & Subsidiary Rules siamthat chungchang te, MAH & VS Grade IV hi Grade III-ah dahkhawm tura hmalak chungchang leh Department Annual Plan buatsaih thin ah officer te zau zawka inrawn tlanga sawi ho thin ni se tih te an ngaihtuah ho a ni.
Vawiin Mizoram Veterinary Service Association (MVSA) General Conference vawi 28-na hawnna inkhawm hi an President Dr. Lalremliana’n a kaihruai a, Dr. R. Malsawma General Secretary chuan Report a pe bawk. Kum kal ta chhunga MVSA member boral - Dr. Kaizahlun leh Dr. H. Lalrinthanga - te sunna hun hman a ni a. MVSA hian Chief Minister Relief Fund atan Rs.20,000/- Khuallian hnenah an hlan nghal a ni.
