No.3364/2020-2020

Lunglei 23rd July 2020 : Vawiin khan Mizoram Youth Commission Chairman Dr. Vanlaltanpuia chuan a bial chhung Mualthuam 'N' khuaa zirlai tithate chawimawina hun a hmanpui.

Zirlai tithate chawimawina hun Mualthuam 'N' BNRGSK Hall-a  neih, Pu C. Lalhmingmawia MNF Mualthuam N Group President kaihhruaiah hian MYC Chairman Dr. Vanlaltanpuia chuan zirlaite fuihna thu sawiin a bial chhunga CATS- IIM zir thei tura inziak tling leh MBBS tling thar an nei chu bialtu a nihna zawnah a inchhuan thlak a tih thu a sawi a, zirlaite tan zirna kawng hrang hrang tamtak awm chu taimakna leh tumruhna nena an beih chuan reilotea hausakna a nih thu sawiin chhel taka an zirna te chhunzawm zel turin zirlai kalkhawmte a fuih a ni.

A sawi zelnaah MYC Chairman chu a bial chhunga sawrkar hmalakna thenkhat sawiin NABARD sum hmanga Mualthuam N khaw tana Mauhak lui tui nizung chakna hmanga lak tawh khaw chhunga sem darh hna pawh reiloteah puitlin a nih tur thu sawiin Lunglei North bial chhungah Sikul panga sak tura ruahmanna siam fel a nih tawh thu a sawi bawk. Hei bakah hian Mualthuam khuaa din tur puanthui mite hmunpui 'Hanloom Park' siamna tur pawh DPR siam fel tawh niin reiloteah a hlawhtlinna hmuh thuai a beisei thu bakah Vety leh Healh Dept. hmalakna thuam that a nih tur thu Dr. Vanlaltanpuia hian a sawi bawk.

Vawiina Zirlai tithate chawimawina hunah hian CATS-IIM zirtura inziaktling Vanlalduata hnenah cheng sing nga a hlan a, MBBS inziak tling Miriam Lalremruati hnenah Laptop hlanin HSSLC pass mi sawm leh HSLC pass mi sawmte hnenah chawimawina thuziak a hlan bawk.

MYC Chairman hian Mualthuam N khaw chhehvela Dragon Fruit chingtute hmalakna a hmunah a en nghal bawk a ni