Pachhunga University College in zirlaite puala a buatsaih "Finishing School" a zirchhuak zirlai 20 te lawmpuina leh Course kharna inkhawm chu vawiin chawhnu dar 1:00 khan Pachhunga University College Teachers' Common Room ah buatsaih a ni a, Mizoram Youth Commission Chairman Pu T.Sangkunga chuan khuallian niin a telpui. "Finishing School" hi Bachelor degree 6th Semester Exam zo tawh te tana buatsaih niin mihring khawsak/nunphung kawng hrang hranga mahni inrintawkna an neih theihna tur a zirtirna tha pek chu a tum ber a ni.

Pu T.Sangkunga chuan zirlaite chu anmahni hmakhua ngaitu leh a ngaihna hria Principal an nei chu an vanneihzia in hre tura chahin Mizoram sawrkar pawhin thangthar ten mahni inrintawkna dik nen huaisen taka khawvel an hmachhawn theihna turin nasa takin hma a la a, Chief Minister pawhin thahnem a ngai em em a, thalaite hmasawnna tur atan chuan sum sen a hreh lo a ni a ti a, kum hnih chhung lekin Mizo thalai 5428 lai skilled training pe in a chherchhuak tawh a, heng zinga 3640 chu Mizoram pawnah training tir niin 1788 chu Mizoram chhungah zirtirna pek an ni a ti bawk. Thalaite chu an thiamna (educational qualification) leh an tuina azirin thil chi hrang hrang IAS Coaching atanga mobile phone repair thleng zirtir an ni a, thalaite mahni kut leh ke a ding thei tura chherchhuah chu an tum bulpui ber pakhat a ni a ti bawk.

Khuallian chuan zirlaite chu fuihin graduate an nih chiah hian an kal dan tur an thlan thiam a pawimawh a, ngaihtuahna fim an hman thiam a tul hle a, kawng engkimah chu chu an hlawhtlinna tehfung pakhat ani reng dawn a ni a ti a, ngaihtuahna fim tak nen an kawng hawi tur lam an thlang fel anih chuan theihtawpchhuaha bei tur leh a man pek ngai a awm ve ani tih hria a tumruhna nen hlawhchham tum lohna rilru pu chunga ke pen a ngaih thu a sawi bawk a ni.

Dr. Tawnenga, Principal, Pachhunga University College, Finishing School duang chhuak tu pawhin thu sawiin a thawhpuiten an tawiawm that avang leh an phur pui avang liau liau a hlawhtling an ni tiin lawmthu a sawi a, Zirna In hian zirlaite ah mahni inrintawkna dik a pe tur a ni a, syllabus siam sa piah lamah zirbelh tur thil pawimawh tam tak a awm avangin zirlaiten College an chhuahsan hnu ah pawh mi zinga inthlahrung lo leh mahni inrintawkna nei chunga khawvel an hmachhawn a, khua leh tui tangkai, midangte tan pawha rin ngam an nih a, nunphung zahawm leh belhchian tlak an neih theih nan kawng kawhhmuh a tul ani tih rinna atanga "Finishing School" chu lo piang chhuak anih thu a sawi a, Course kalphung leh Resource Person te pawh uluk taka thlan an nih thu leh kum tharah chuan tun aia changtlung zawka kalpui tura ngaihtuahna sen mek anih thu a sawi bawk.

Finishing School hian innghahna thupui atan "Mind Without Fear" hmangin kum 2012 atang kalpui tan a ni a, kuminah hian May ni 30, 2016 atanga June ni 16, 2016 thleng he Course hi kalpui niin zirlai 20 (mipa-4, hmeichhia-16) in hlawhtling takin an zir zova, Course Co-ordinator Dr. David Zothansanga, Asst. Prof., PUC leh Asst. Co-ordinator pahnih Pi Lal Lawmzuali, Asst. Prof., PUC leh Pi Vanlalveni Pachuau, Asst. Prof. PUC ten hneh taka enkawlin zirlaite hi sunject chi hrang hrang Manners & Etiquette, Communication Skills, Photography, History & Culture of India and Mizoram, Child Care & Child Psychology, Cooking Classes, Flower Arrangement, Life Skills, Beauty Culture, Home Appliances, First Aid, Hygiene & Cleanliness, Interview Skills, Financial Management, Career Guidance, Disaster Management, Fitness & Nutrition leh Music te zirtir an ni a, zirtirtu tur pawh mithiam leh hmingtha bik thlan an ni.

"Finishing School" hlawhtling taka zir zo te hnenah hian khuallian Pu T.Sangkunga'n Course Completion Certificate a hlan vek a ni.