Nimin khan HeritageFoundation,Assamleh YMA Sub. Hqrs. Lunglei tawngkawpinIndiazalenna atana beitu ropui leh Mizorama freedom fighter awmchhun Pu Darthawma, Chanmari, Lunglei chawimawina hun chu  YMA Conference Hall, Lunglei-ah hman a ni  a. He hunah hian Lunglei bawrhsap Pu V.Sapchhunga chu Khuallian niin Maj. Gaurav, 2IC, 28 AR Lunglei leh Pu Hurui Zeliang, Dy. Speaker, Naga HOHO te chu Khual Zahawm an ni.

Darthawma chawimawina inkhawm Pu Jaleswar Brahma, Chairman, Heritage Foundation kaihhruaiah Khuallian Pu V.Sapchhunga chuan ram zalenna sualsutu zinga tel pha, mi huaisen leh hmingtha Pu Darthawma ang hi Lunglei-in kan nei hi a vanneihthlakin Lunglei timawitu a ni, a ti. Heritage Foundation bultumin Pu Darthawma chawimawina hun kan hmang thei chu Lunglei District tan ni ropui a ni a, thangthar ten amah ngei a taka kan la hmu thei hi a vanneih thlak hle a, a hnathawh leh sulhnu hi kan theihnghilh ngai lovang, a ti bawk.

Pu Darthawma chawimawinaah hian a fapa Pu Lalbiaktluanga’n an chhungkua leh thlahte aiawhin thu a sawi a. Pu Darthawma pawhin chawimawina a dawng chu ropui a tih thu sawiin kalkhawmte leh amah tawiawmtu zawng zawng chungah lawmthu a sawi bawk a ni.

Pu Darthawma hi May ni 15, 1921 khan a piang a, hetih lai hian British awpna hnuaiah India hi a la awm a ni. Kum 1939 khan Indopui II-na a lo chhuak ta a, Pu Darthawma leh Mizo tlangval dang 17 te chu sipai-ah tang vein Indian Army Medical Corps-ah 1940 khan an lut a ni. Hemi hnu lawk khan Indopui II-na chu a vawrtawp thleng chhovin Pu Darthawma hian Subhas Chandra Bose kaihhruaina hnuaiah Indian National Army (INA) a zawm veleh ta a. Kum 3 chhung INA-ah awmin British sipaite chuan British kalh zawnga che-ah puhin an man ta a, Chittagong leh Calcutta Jail-ah te tan tir a nih hnuin ramchhung sorkar inrelbawlna a danglam hnu 1945 khan Lucknow Jail atangin chhuah a ni ve ta a ni. India sorkar chuan chawimawina ropui ‘Tamrapatra’ chu kum 1972 khan Pu Darthawma hnenah a hlan tawh nghe nghe a ni. Pu Darthawma hian tunah kum 92-na a hmang mek a ni.