Tun Lok Sabha MP thlan thar Pu C.L. Ruala chuan Mizoram chhunga Oil & Natural Gas zawn chhuah hna chu a ngaih pawimawh hmasak a nih tur thu sawiin tun 22nd May khan India ram Oil & Gas zawn chhuah hnaa a khai pa ber Director General of Hydro-Carbon, Ministry of Petroleum, Govt, of India hna chelh mek Shri Sibal-a a hmu. Pu Sibala chuan Mizoram M.P. hnenah Mizoram chhungah tunah chuan tih tak zeta Oil leh Gas zawn hna hmalak a nih thu leh Company hrang hrangten hna an thawh dan a hmuna enfiah pui turin June 2009 hian Mizoram a rawn tlawh tur thu pawh a lo hrilh. M.P. Pu C.L. Ruala nen hian Mizoram intodelhna tura hma lian tham Oil & Gas zawn chhuah hna chungchanga hmalak dun dan tur leh kan Mizo thalai rualte he lama thiamna chi hrang hrang an neih theih nana zirlaite thawn chhuah dan tur khunkhan takin an sawiho.

Pu C.L. Ruala hian tuna Mizorama hmala mek Oil India Ltd. a an Chairman and Managing Director (CMD) Shri. N.M. Borah nen pawh in hmuin an hma lak zel dante ngun takin an sawi dun bawk. Oil India te hian power point presentation te buatsaihin M.P. thar hi an hna kal phung an hrilhfiahin an thlirho a ni. Kum 5 chhungin Oil & Gas zawnchhuah nan a tlem berah khur nga (5 wells) verh hman an tum a, chumi a tana senso tur U.S. dollar maktaduai 170 zet pawh an ruahman fel tawh thute an tarlang, a tul ang zela Mizoram sawrkar nena thawh dun zel an tum thu M.P. hi an lo hrilh bawk. Pu C.L. Ruala chuan Mizoram sawrkar pawhin a theih chin chinah a theih dan ang anga tanpui a hnial loh thu a hrilh ve bawk.

M.P. hi Geology & Mining Wing-a Joint Director Dr. H. Lallenmawia’n a tawiawm bawk.