Vawiin chawhnu dar khat khan Secretariat Conference Hall, Secretariat Complex, Aizawlah Mizorama Oil leh Gas zawn hna kal mek thlirhona "7th Review Meeting of Oil & Gas in Mizoram" neih a ni a. Geology & Mineral Resources Minister Pu H. Rohluna chu Khuallian niin Parliamentary Secretary Pu Joseph Lalhimpuia chu Khualzahawm a ni a. Review Meeting-ah hian Geology & Mineral Reources, PWD, PHE, P&E leh Home Department hotute bakah ONGC leh OIL aiawhten Oil leh Gas zawn kawnga hna thawh zawh chinte, hmathlir leh hmalak zel dan turte bakah Hydrocarbon Vision 2030 chungchang an sawiho a ni.
Khuallian, Geology & Mineral Resources Minister Pu H. Rohluna chuan oil leh gas laihchuah chu hna hautak tak, hun leh tha tam tak bakah thiamna sang tak hmanga thawh ngai a nih avangin sawrkar chuan uluk takin hma a la tih sawiin, Mizoram sawrkar chuan ONGC leh Oil India Limited (OIL)-te chu theihtawpin a thawhpui zel dawn a ni, a ti a. Sawrkarin Hydrocarbon Vision 2030 thiltum tihlawhtling tura hma a lak tur thu leh Mizoram chhimlama Oil leh Gas zawn hna pawh kalpui mek a nih thu Minister chuan tarlang bawk. Khuallian Pu H. Rohluna chuan NE Hydrocarbon Vision 2030 zulzuia Bairabi Thermal Plant, 12 MW, atan Meidum leh Cachar Area-a gas hmuhchhuah tawhte hman tangkai dan tur zirchiang turin ONGC thuneitute leh State sawrkar-a a kaihhnawih Department Official-te a chah bakah ONGC leh OIL Company hotute chu chak leh zuala hma la tur leh minimum work programme ngaipawimawh turin a hrilh bawk.
Khualzahawm, Parliamentary Secretary Pu Joseph Lalhimpuia pawhin 7th Review Meeting-a tel zawng zawngte chu Meeting rorelte bawhzui kawnga thahnemngai lehzual turin a sawm a, Review Meeting chu tihdan phung pangngai maia ngai lo turin a chah bawk.
He Review Meeting hi Industries Department Commissioner/Secretary, Pu Zothan Khuma, ITS chuan a kaihruai a. Geology & Mineral Resources Director Pu Lalhmachhuana leh Oil Company hotuten Power Point Presentation hmangin hmalakna hrang hrang an en tir a ni.
Tunah hian Mizorama OiL Block pahnihah ONGC leh Oil India Limited (OIL)-ten hna an thawk mek a. ONGC hian Meidum leh Zanlawnah lei verh hna hi an zo tawh a; Meidumah hian Gas deposit engemawzat hmuh tawh a ni. OIL hian Maubuanga an leiverhah Gas tlema zawng an hmuh tawh bakah Keifangah lei an verh leh mek bawk. Mizoram South Block (3619 Sq.km)a oil leh gas zawn nan hian Global Tender chhuah tura hmalak mek a niin E&F Clearance leh Clearance dangte tihfel a ni tawh a, hei hi sawrkar laipuia Ministry of Petroleum & Natural Gas-ah thehluh a ni tawh bawk. Oil & Gas zawn chungchanga Chief Minister leh Geology & Mineral Resources Minister-te hmalakna chuan rah chhuahin sawrkar laipuia Petroleum & Natural Gas Minister of State Pu Dharmendra Pradhan pawhin Mizorama oil leh gas zawn hna chak taka kalpui turin thuchhuah a siam tawh nghe nghe a ni.
