5027/2025-2026

Dated Aizawl, 27th March 2026: Vawiin khan DP&AR (GG&TW) chuan, Chief Secretary, Govt. of Mizoram kaihhruaiin sawrkar hna thawkte'n mipui tana tangkai zawk leh tha zawka an hnate an thawh theih nana ruahmanna hrang hrangte sawi hona hun "State Consultative workshop on Institutionalizing Capacity Building: From Training to performance linked Governance” chu Secretariat Conference Hall, MINECO-ah an hmang. Workshop-ah hian Department hrang hrang leh Mizorama Training Institute thenkhat-a hotute an tel a ni. 

Vawiin workshop-ah hian thupui pawimawh tak tak - sawrkar hna thawkte'n an hna chanpual mila an mamawh tak Training an neih theih dan tur te, Mizorama Training Institution lian ber ATI leh Training Insitution dangte tih changtlun chungchang te, mi mal tinte mamawh zirna tha pek nana AI leh Technology dangte, a tangkai thei ang bera hman te leh sawrkar hna thawkte'n an hna vawn lai mil tura Training an lo neih tawh thinte pawh, tha zawk leh awlsam zawka tunlai thiamna mila thuam that chungchang te rel a ni a; Department of Personnel & Training (DoPT), Government of India-a theh luh tur report duan tur te, Sadhana Saptah (April 2–8, 2026) hman dan tur chungchanga department tinte hma lak dan tur duan leh hemi chhunga iGOT Karmayogi course ruat sate zawh fel tur thute rel ho a ni.

Rawtna pawimawh langsar zual zingah - Administrative Training Institute (ATI) kaihhruaina hnuaia district hrang hrangah Centres of Excellence din te, Capacity Building Plans (CBPs), iGOT, leh HR system-te thlun zawmna hmunpui (integrated ecosystem) siam te, AI hmanga zirna platform, mizo ṭawng ngei pawha hman theih tur siam chhuah te leh ATI Mizoram chu training leh thawh hona kawnga khaipa ber (apex institution) ni tura tih chak te a tel a ni.

Workshop hi National Departmental Summit, May 15 - 16, 2026-a lo awm tur atana Mizoram sawrkar lo inbuatsaihna niin Mission Karmayogi leh Viksit Bharat 2047-te nena inmil tura state hma laknate her remte chu he workshop-in a thil tum pawimawhte an ni bawk a. He Workshop hi Department hrang hrangte'n hun tiam chhunga an Department Capacity Building Plan theuhte lo siam tura beiseina nen khar a ni.