Kum tinin India zalenna suala nun chanta te hriatreng nan ram pumah January 30 hian Martyr’s Day hman thin a ni a. Mizoram sorkar pawhin kumin hian urhsun takin he ni hi a hmang leh dawn a. January ni 30, zing dar 10:59 - 11:00 inkarah Siren tihrik a ni ang a, hna kal lai zawng zawng dahtha in ngawi rengin minute 2 chhung din tur a ni ang. Minute 2 a ral tih hriattir nan Siren hi dar 11:02am-11:03am inkarah tihrik a ni leh ang.

Hemi ni hian New Secretariat Complex-ah chuan Officer leh Staff zawng zawng te zing dar 10:55 ah Main Gate kawtah kalkhawm vek tur a ni a. Old Secretariat Complex-ah chuan Block ‘A’ zawna hmun awl zau laiah kalkhawm tur a ni. Raj Bhavan, Chief Minister’s Office leh Ministers/ Parliamentary Secretaries ah pawh he hun hi hman a ni ang. Heng bakah hian Aizawl khawpui chhunga sorkar Office zawng zawngah Heads of Department emaw Heads of Office te kaihhruaiin hun hman tur a ni. Siren hi Aizawl DC Office atanga tihrik a ni ang a, Traffic two-way radio hmangin khawpui chhung zawng zawngah Siren ri hi pekchhuah a ni ang. Siren hi tihrik anih veleh lirthei tlanlai zawng zawng dintir tur a ni a, mipui he Siren thawm hre pha apiang te pawh an theih chin chinah an thil tih lai te chawl a, ngawi renga ding ve tura beisei an ni.

District dangah chuan Martyr’s Day hman dan tur ruahmanna hi DC theuh te kutah dah niin Sub Division, Block leh Village Level Office zawng zawngah pawh he hun hi hmang ve tura hriattir an ni a. Zirna in hrang hrangah pawh he hun hi urhsun taka hmang ve tura beisei an ni bawk.