World Bamboo Day puala India hmarchhak state-ten kum tin a hohova programme an hman thin chu kumin hian Mizoramah nghah a ni a. Ni hnih awh tur Mizoram World Bamboo Day (North East Region), R. Dengthuama Indoor Stadium, Mualpuia buatsaih chu Chief Minister Pu Lal Thanhawla chuan khuallian niin a hawng. He hunah hian Deputy Speaker Pu R. Lalrinawma , Dy. Chief Whip Pu RL Pianmawia leh Mizoram sawkara department hotulu hrang hrang bakah Ministry of EF&CC leh DoNER atanga mi paiwmawh tak tak an tel a ni.

Chief Minister Pu Lal Thanhawla chuan India hmarchhak state te chu mau ah an hausa in, rampum mau neih tam zawk chu India hmarchhak ah a awm thu a sawi a. Heng hausaknate hi ei leh bar hmasawnna atan tangkaia hman dan tur ruahmanna DoNER Ministry in a siam chu lawmawm a tih thu a sawi a. Mizoram mau chu state pawnah lehkha siamchhuahnaah thawn thin a nih thu leh, chung paper mill-te chu tihtawp a nih tak hnu in mau hman tangkaina tur dang ngaihtuah a tul thu a sawi a. State sawrkar chuan mi remhria ten mau hmanga thil chi hrang hrang siamchhuaktu a eizawnna tha ah an chhuah theih nan hma a lakpui thu Chief Minister chuan a sawi a. Hralhchhuahna kawngah harsatna a awm thin thu a sawiin Pu Lal Thanhawla chuan pawnlam investor-te chu Mizoram potential ngaihtuah chunga, zavai hlawk tlan nan Mizoramah investment ti turin a sawm nghal a ni. Chief Minister chuan sawrkar laipuiin environment humhalh a tul zia hre reng chunga ram pum leh a bik takin India hmarchhak state te hmasawnna tura hmalak a ni chu lawmthu sawiin, India hmarchhak state zawng zawng huap World Bamboo Day lawmna chuan rah tha a chhuah ngei a beisei thu a sawi bawk.

Kumin World Bamboo Day (NER) thupui chu "My Bamboo, My Wealth" (Mau - Kan hausakna) tih a ni a. Chief Secretary Pu Arvind Ray chuan kalkhawmte lawmna thu sawiin programme hi bultan niin, inkhawm hun kaihruaitu Pu Lalram Thanga, Principal Secretary, EF&CC chuan Mizote chuan hmasang atang tawhin mau chu an nitin nunah a bet tlat a, vawiin thlenga ram ei leh bar tihmasawnna hmanrua pawimawh a la nih theih thu a sawi a ni.

Vawiin programme-ah hian Pu Naveen Verma, DoNER Secretary, Pu Ram Muivah, NEC Secretary leh Pu Pankaj Asthana, IGF(NAEab) Ministry of EFCC te hnen atangin thusawi ngaihthlak a ni bawk. Pu L.Murray, Mission Director, National Bamboo, Mizoram chuan lawmthu sawiin hun a khar a ni.

Mizoram World Bamboo Day (NER) hi Ministry of Environment, Forests & Climate Change, Ministry of Development of North East Region, GIZ (India-Germany cooperation) tangkawp a buatsaih a ni a. Mau tangkaina leh thatna inzirtirna hun te hman niin, zirlaite tan lemziah leh mai tah intihsiakna neih a ni a. Photography intihsiakna buatsaih ni bawkin, mau atanga thilsiam hrang hrang entirna leh hralhna neih a ni bawk. State dang hrang hrang atangin he hun hi chhim turin leh exhibition a tel turin an lo kal a ni. Pachhunga University College-ah DoNER Secretary kaihhruaiin mau hman tangkai kawnga hmasawnna chungchangah Technical Session neih chhunzawm a ni. Bamboo Day ni hnihna hi zirlai leh kuthnathawktute tan Bamboo Centre, Aizawl Bethlehem Vengthlangah Study Trip buatsaih a ni dawn a, official-te tan Field Trip (Aizawl-Zokhua-Hmuifang) buatsaih a ni dawn a. Hemi rual hian chawhma dar 10 atangin Confederation of Indian Industry, Mizoram buatsaihin R. Dengthuama Stadium-ah hian Buyer- Seller Meet buatsaih a ni bawk ang. Tlai lamah Fashion Show, lam leh zai entirna hun neih a dawn a ni.