171/2026-2027

Aizawl, the 16th April, 2026 : Vawiin April ni 16,2026 khan Fisheries Department Secretary, Er Lalrothanga hovin a pisa-ah Sangha thianghlim zawk lakluh leh zawrh chhuah chungchang sawihona hi neih a ni a. Fisheries Departments leh Food & Drugs Administration lam officials te an tel a ni.

Mizoram hian sangha kan kham khawp kan la thar chhuak thei lova, engemawzat phai atangin lakluh a la ngai a, Fisheries Department chhinchhiah danin kum khatah 11808qtls vel lalut angin tarlan a ni a. Mizoramin sangha a tharchhuah tamna Kolasib leh Mamit District ami te chu State dangah a tam zawk hralh chhuah thin a nih thu leh kan sangha mamawh tam zawk hi phai a tanga lakluh thin a nih thu sawiin Er. Lalrothanga chuan Mizorama sangha thar chhuah te Mizoram chhung ngeia hralh chhuak thei tura a zuartute pawh hmalak pui a ngaih thu a sawi a, tin heng kan sangha eite pawnlam atanga lakluh leh Mizorama thar ngeite pawh hi a thianghlim tawk em tih enfiah a tul a, Sangha hi Fisheries Department enkawl a a nih laiin hmun dang atanga lakluh leh a thianghlim leh thianghlim loh endik ah erawh chuan thuneihna an neih loh thu sawiin hemi enfiah dan tur  hi Standard Operating Procedure mumal tak  siam vat a tul thu a sawi a.

Food & Drugs Administration lam aiawh, Pi Lalrinkimi Pachuau, Designated Officer(Food Safety)  chuan an hmalakna te sawiin FDA in state dang aṭanga sangha lo lut  endikna an lo neih tawh dan a report a.  Amaherawhchu thawktu leh sum indaihlohna avangin regular taka endikna an kalpui theih loh thu an sawi bawk.  National Food Safety & Standards Act hnuaiah eitur zuartute mai bakah a hlawma lalut tuten lakluh phalna leh zawrh phalna nei turin an hnen atangin certificate an neih a ngaih thu leh, dan an zawm loh chuan hrem theih an nih thu sawiin, sangha thianghlim leh hrisel zawrh leh hralh a nih theihna tura SOP siam ngei ṭha a tih thu a sawi bawk.

Kalkhawmte chuan Mizoram sangha tharte State pawna thawnchhuak lova mipuite hnena lei theiha siam chu tul an ti hle a, a bak mamawh state dang atanga lakluh tur pawh a thianghlim thei ang ber lakluh anih theih nana hmalak ho dan turte an rel a. Health Department hnuaia Food & Drugs Administration lamin Standard Operating procedure hi rawn duang se, a tul ang angin Fisheries Department in lo puibawm se, thawktu leh sum mamawh angte chu Sorkarah dil ve mai ni se an ti a ni. Sangha zuara eizawngte pawh Mizorama tharchhuah ngei sangha a tam thei ang ber an zawrh dan ngaihtuah tura hmalak pui dan zawn pawh an ngai hle a, pawnlam atanga lakluh pawh thianghlim zawk lakluh anih theih nana hmalak pui dan zawn dan turte SoP ah hian dah tel ni se an ti a ni.