No.1391/2021-2022

Aizawl, 14^th July, 2021 : COVID-19 hripui leng dona kawnga Mizoram sawrkarin hma a lak dan leh a inbuatsaih dan rawn zirchiang tur Central team of Experts member pahnihte chuan vawiin khan Health & Family Welfare Minister Dr. R. Lalthangliana chu a pisa ah an kawm.

Expert lo kalte hi Dr. Vinita Gupta, Epidemiologist, IDSP and nodal officer for Mizoram, NCDC, Delhi leh Dr. Shiva Kumar Chimtla, Chest Physician, Dr. RML Hospital, New Delhi te an ni a. Mizoramin hripui leng dona kawnga hma a lakna kawng hrang hrang sample test, contact tracing, containment zone kalpui dan, COVID Appropriate Behaviour, Damdawi in hrang hrangte inbuatsaih dan leh thil pawimawh dangte an zirchiang ang a, an thil hmuh leh zirchianna atanga report leh recommendations an neihte sawrkar laipuiah an thlen bakah an haw thlak leh hmain sawrkar official pawimawhte nen an sawiho bawk ang.

Health Minister Dr. R. Lalthangliana chuan Central Expert Team te chu lo lawmin Mizoramah an rawn kal theihnan ngaihtuahna an sen mek laia an rawn thleng chu lawmawm a tih thu a sawi a, an thil zirchianna chuan Mizoramin hripui a dona kawnga awmzia a neih ngei leh Mizoramin a tangkaipui ngei a rin thu a sawi a ni.

Central Expert Team hian  July ni 20, 2021 hian Mizoram an chhuahsan leh dawn a ni.

Vawiin inkawmhonaah hian Health Secretary Pu R. Lalramnghaka, NHM Mission Director Pu Eric Zomawia, IDSP Nodal Officer Dr. Pachuau Lalmalsawma leh Health department hotu pawimawhte an tel a  ni.