Mizoram Journalist Association (MJA) Champhai District chuan vawiin khan Annual Conference vawi 30-na leh kum 2018-2020 chhung atana hruaitu tur thlanna MJA Champhai District Press Club, Bethel Veng, Champhaiah an nei. He hun hi Er. Lalrammawia,SE,PHED Champhai WATSAN Circle chuan khuallian niin a hmanpui a ni.
Khuallian chuan Journalist-te chu thu dik leh belhchian dawl tak zau zawka thehdarhtu nih tum hram hram turin a chah a. Editorial fumfe tak mite tana bengvarna, thu dik pai leh ram khalh ngil thei ziah kawngah tan lak a tul thu a sawi a. Politics a awn lam bik nei lovin an rawng bawlsak mipuite dah hmasa thiam fo turin a fuih a. Taihmakna leh rinawmna chawinung zela khawtlang leh ram tana rawngbawl zel turin duhsakna a hlan nghal bawk a ni.
Pu C.Lalhnunpuia, President MJA Champhai District pawhin thu sawiin Journalist-te chu an dinchhan mipuite tana rawngbawlsaktu an nih hre thar leh tura a duh thu a sawi a. Thu belhchian dawl chauh puang thei tur chuan awm hmun maia hnathawk lovin thil thlenna hmun thlenga kalchilh peih a ngai a ni, a ti a. Media mi ten zalenna zau tak an neih chu hman thiam a tul tak zet thu a sawi a. Tunlai mil zela intuaithar leh inherrem chu thil tih makmawh a ni, a ti a. Pawl anga an hnathawh kawngah thawhhona tha tak a awm thin chu lawmawm a tih thu a sawi bawk a ni.
Vawiina MJA Champhai District Annual Conference hi Pu R.Lalfakawma,Vice President, MJA Champhai District-in a kaihruai a. Pu Chanchinmawia, Assistant Secretary leh Pu Lalnunsanga Fanai, Treasurer-te hnen atangin report ngaihthlak a ni a.
Chawhnu lamah President Pu C. Lalhnunpuia kaihhruaina hnuaiah rorelna neih a ni a, tlai lamah kum 2018-2020 chhunga an pawl hruaitu tur thlanna DIPRO Champhai Dr Lallawmkima kaihhruainain neih a ni a. Hruaitu thar thlanchhuahte chu:
President: C.Lalhnunpuia, DDK Correspondent
Vice President: R.Lalfakawma, Joint Editor, Rihlipui
Treasurer: Lalnunsanga Fanai, News Editor, Pasaltha
Heng bakah hian Executive Member thar 5 thlanchhuah an ni bawk. Programme zawhah hian chawhlui an kilho nghal a ni.
MJA Champhai District hi kum 1972 a din niin tun dinhmunah hian Member mi 15 an awm mek a, heng zinga mi 12 hi Champhaia awm niin Khawzawlah mi 3 an awm bawk a ni.
