Vawiin khan Mizoram Journalists’ Association Gen. Hqrs. chuan Aizawl Press Club-ah Information & Public Relations Director thar Pi Lallianpuii, MIS lawmpuina leh I&PR Director kalchhuak ta Pu David L.Thangliana, MIS thlahna hun an hmang a. Vawiin Press Club-a hun hman hi Pu Lalremsiama, Vice-President, MJA-in a kaihruai a; MJA President Pu Zonunsanga Khiangte, I&PR Director hlui Pu David L.Thangliana leh I&PR Director Pi Lallianpuii ten thu an sawi a ni.

MJA ten I&PR Director-te an chawimawina hunah hian I&PR Director Pi Lallianpuii chuan Mizorama journalist-te leh I&PR Department inkara thawhhona boruak tha  leh langtlang tak hi chhawmnun zel a nih theih nan theihtawp chhuah turin a chah a. Mizoram-ah media-te hmasawn nan I&PR Department leh amah mimal tak pawhin a tul ang zelin hmalakpui leh thawhpui an tum a ni, a ti. I&PR Director kalchhuak ta Pu David L.Thangliana pawhin thusawiin I&PR Director a nih chhunga MJA-ten amah an tawiawmna leh thawhhona tha tak an neih avangin lawmthu a sawi bawk.

Vawiin vek khan Mizoram Journalist Welfare Society (MJWS) chuan tun hnaia an Member boral ta Accredited Journalist Pu R.Lalhmangaihzuala ralna hun an hmang nghal a. MJWS hminga ralna sumfai Rs.1,50,000/- chu I&PR Director Pi Lallianpuii’n Pu R.Lalhmangaihzuala (L) nupui Pi Lalfamkimi hnenah a hlan a ni.