Mizoram Journalists' Association (MJA)  President Pu H.Zosangliana chuan vawiin June 21, 2011 (Thawhlehni) chawhma dar 11 khan I&PR Conference Hall-a Mizoram Academy of Fine Arts (MAFA) buatsaih Fine Arts Seminar a hawng.
Pu H.Zosangliana chuan Fine Arts Seminar buatsaih ani chu lawmawm a tih thu leh zirlaite pawhin an chhawr tangkai ngei a beisei thu a sawi a, hetiang huna paper buatsaih thei artist engemawzat an awm leh midang tana an thiamna an pechhuak chu lawmawm a tih thu a sawi bawk. Arts ah hian tribal quota a awm lo a, a thiam thiam ani tawp mai a. Mizote hian thil kan thiam ve zul a, tunlai khawvelah chuan mi bik tan lo chuan thiltih theih ani tawh  lo.  Chutiang anih lai chuan Fine Arts School mumal tak kan neilo a, pawl thahnemngaihna a basic inkawhhmuhna siam ani hi a vanneihthlak a, naupangten an hlawkpui ngei ka beisei ani, a ti a.  Arts ah hian rotling zawk chu sum leh pai nilovin kut chhuak a ni tiin Mizo hnam tana chhuan tlak kut chhuak nei tura he seminar hi hmang tangkai ngei turin artist te leh helam tuimi zirlai naupang kalkhawmte chu a chah a ni.

He Seminar hawnna hi Pu HK Jerry Ramliana, President MAFA in a kaihruai a, chawhma hunah paper pahnih 'Mizoram Art History' Pu Lalbiaklara, Diploma in Fine Arts buatsaih leh 'Graphic Art (Painting)' tih Pu Lalremruata Varte BFA(Graphic) buatsaihte ngaihthlaka sawiho a ni a. Chawhnu lamah 'Visual Art leh Mizoram' tih Tv. Isaac Malsawmtluanga, MFA (Painting) buatsaih leh 'Sculpture' tih Tv. John Lalchhuanawma IInd Yr. BFA(Sculpture) ziahte ngaihthlaka sawiho a ni bawk.

Seminar ah hian MAFA member te bakah Arts lam Association dang leh sikul naupang Art lama tui zual deuh an sawm bikte an tel a, Seminar chu hlawk thlak an tiin Arts lama hmasawnna rahbi pakhat anih ngei an beisei thu an sawi a ni.