1211/2025-2026

Champhai, dated 17th July 2025: Nimin khan Ngur khuaah National Mission on Natural Farming Kick Off Programme chu District Agriculture Office leh Allied Department te tang ho in buatsaih a ni a, Champhai North bialtu MLA Er. H. Ginzalala chu khuallian a ni.

He programme-ah hian khuallian Er. H. Ginzalala chuan loneitute tan a tha tur Central Scheme kal pui a nih dan tur chu loneitute tan a thil lawmawm tak a nih thu a sawi a, chemical avanga lei lung chhe zel tur ven chu tih makmawh a nih thu sawiin Department te leh loneitute chu hrui khat vuan a tang ho tlat turin a fuih a. Hma thlir thui tak nei tur leh tu leh fate thlenga rochun tur lei leh environment tha an neih theih nan he scheme hmang hian tang sauh sauh turin a fuih a, harsatna leh buaina a awm chuan Sawrkarin pui turin a in peih reng thu leh loneitute chawi kan hi Sawrkar thil tum hmasa ber pakhat a nih avangin zam hauh lo turin loneitute a chah. Natural Farming Scheme chu thil thar angin lang mahse Mizo te thiam chi tak a nih sa avangin harsatna a awm a rin loh thu a sawi a, Champhai District-a khaw pawimawh tak tak he scheme hian a tuam dawn avangin taima takin, hlawhtling ngei tura thawhho pui atan a sawm nghal bawk a ni.

He hun hi F. Lalmalsawma, DAO chuan a kaihruai a. Natural Farming hi department-in theih tawp chhuahin a kal pui dawn a, farmer te nen thawhhona tha tak an lo neih thin tawh chu he scheme ah pawh hian kal pui zel a nih theih a beisei tlat thu a sawi. Dr. B. Zosangkima, BTM, ATMA chuan Technical Report a pe a, Champhai District-ah Cluster 13 a awm dawn a, cluster khat zelah farmer 125 an awm zel dawn tih sawiin, beneficiary te pawh uluk taka thlan mek zel an nih thu a sawi.

He hunah hian department hrang hrang DRDO, Horticulture, AH & Vety, NABARD, ATMA, KVK, District Cooperation Office bakah Bank lam te pawh telin stake holder te an kim hle a ni. Department hrang hrang kal te leh loneitute inkawm khawmna hun pawh neih nghal a ni.