15/2026-2027

Dated Champhai, 2nd April 2026: Champhaiah Commerce & Industries Department, Govt. of Mizoram chuan nimin khan puan thui zir kharna hun leh certificate semna hun hman a ni a, Er. H. Ginzalala, Champhai North bialtu MLA leh Adviser to CM (Technical) ni bawk chuan khuallian niin a hmanpui.

He hun hi Knitting & Tailoring Centre, DIC Champhai ah hman niin Pu Vanlalpara, DCIO, Champhai chuan a kaihruai a ni.

Khuallian Er. H. Ginzalala chuan thu sawiin, puan thui zir mi 11 laiin an zirchhuak thei leh anmahni hak tur an thui thei nghal mai chu lawmawm a tih thu sawiin hlawhtlinna ropui tak a nih thu a sawi a, Batch thar tileh nghal turin Advertisement pawh chhuah lehnghal tha a tih thu a sawi a, Sawrkar hmalakna bawkin tar enkawl dan training thla thum chhung buatsaih niin hlawhtling taka zawhfel a nih tawh thu a sawi bawk. Sawrkarin intodelh kan nih theihna tur chak takin hma a lak mek a, hei hi a hlawhtlin theihna tur chuan thalai te'n kut themthiam thil an neih a tul thu tarlangin, hemi atan hian project tam tak kalpui zel an tum thu leh thalaite kutthemthiamna pek zel an tum tih a tarlang bawk. Hna kan thawh reng rengin kahpah lutuk a thiltih hian hlawhtlinna a tihthuanawp theih thu a sawi a, ngaihtuahna zau tak pu a, tihdan phung kan lo neih tawh thinte paih vek a, hma kan sawnna tur leh kan hlawhtlinna tur a nih chuan kan tih ngai loh pawh tithei tura rilru inbuatsaih a tul thu a sawi.

Khuallian chuan traning zo tawhte chu trainingah duhtawk mai lo turin a chah a, an hun kal zel turah an zirlaia an zir thin bakah thiam thar nei zel turin a fuih a, puan thui kawngah mi tih ngai loh design thar neih tum theuh turin a fuih a, an kal zelna turah duhsakna a hlan a ni.

Pu Vanlaltluanga, LDC i/c K&T Training Centre chuan kum 2019 - 2020 kha training an buatsaih theih hnuhnungber a nih thu sawiin Sawrkar hmalakna a zarah kum 2025, October ni 1 atang khan training kalpui leh tan a nih thu a sawi a, mi 15 te'n training hi an kal a, mi 11 te'n hlawhtling takin an zirchhuak tih a tarlang bawk.

He hunah hian Instructress Pi Lalrinmawii bakah Trainees Lalhmangaihzuali leh Emily Vanlalhmingduhzuali te hnen atangin thusawi tawi ngaihthlak a ni a, puan thui zirchhuak mi 11 te hnenah Certificate semchhuah nghal a ni a, Certificate hi Khuallian Er. H. Ginzalala chuan a sem nghal a, Certificate bakah Stipend a sem nghal bawk.