No.473/2021-2022

Saitual, 11th May, 2021 : Vawiin khan Pu L.Thangmawia, Lengteng bialtu MLA, Human Resources Development Board Vice-Chairman chuan a bial chhung kalpawhna kawng pawimawh tak Saitual atanga Saichal panna NH-102B siam hna (Blacktop ) kalpui mek chu a hmunah kalin a enfiah a, kawng siam hna thawhktute kawmin "He kawng hi kan mit naute tluka kan ngaihpawimawh a ni a, tha taka siam hi thiltih makmawh a ni," a ti.

Pu L. Thangmawia hian kumin kumtir khan chanchinbumite nen he kawng siam mek hi lo enfiah tawhin, he hna enkawltu National Highway & Infrastructure Development Corporation Limited (NHIDCL) leh Contractor-te chu tha taka thawka, huntiam chhunga hna zo hman turin a lo chah tawh a. Hemi huna telpuitu YMA hruaitute pawh hna kal dan that leh that lohte, a hun chhunga thawh zawh chungchangah pawh lo enpui a, an phak ang anga lo vil tur leh Kawngtha tak nei thei tura tan lakpui turin a ngen tawh a, a ngenna ngai pawimawha YMA Sub Hqrs. Saitual leh a chhehvel YMA hruaituten kawng siam mek thahnemngai taka an lo vil avangin Pu L. Thangmawia chuan YMA hruaitute chungah lawmthu a sawi a, Mizoram Sawrkar enkawl kawng siam hna vilpui tura YMA nena inremna siam tawh piah lama Central Sawrkar hnuaia Company hnathawh mek enpui hna YMA-in tlawmngaia an lo thawk chu neitu rilru atanga lo chhuak a ni, a ti a. Chawl lova thawhhopui zelah a sawm nghal bawk a ni. Hna thalo laite chu a tira duan a nihna ang taka thaa siam turin he huna lokal hna thawktu Contractor-te pawh hrilhin, NHIDCL hotute pawh ngun zawka a vil hna thawk turin a hrilh bawk a ni.

He kawng siam meka duhthusam lo lai deuh hi tualchhung Contractor, Mizote chan chhung a ni deuh zel a, heng hna hi Vai Company lian ten hneh zawk leh tha zawka direct-a an thawh theih a nih laiin, ram leilungfate kuta a hlawkna lut tur duhin, phase hrang hrang 5-ah then a thawh tir an ni a, tualchhung miin an hna chanlaia sawisel tur a awm hi pawi a tih thu sawiin, a tha tawklo laite hi siamtha leh vek turin Pu Thangmawia hian tualchhung contractor-te a hrilh bawk.

Pu Thangmawia chuan, "He kawng leh Zoram hmun hrang hranga kawng siam hna tam tak hi Central Sawrkar hnuaiah Company-in direct-a an enkawl, state sawrkarina a dawhthleng kan lo dawh mai a nihna chen a awm a. Sum tam tak senral hmanga kawng tha tak leh chhawrnahawm tak kan neih theihna tura theihtawp lo chhuah a, lo enpui leh lo tanpui hi kan tih tur a ni," a ti.

He huna kal ve Pi Margaret Lalrinawmi, Addl. DC, Saitual District chuan kawng dinhmun leh siamthat a nihna turah a tul anga hmalak an tum thu sawiin, Chief Secretary hnenah pawh report an thehluh nghal tur thu a sawi bawk.

Saitual-Saichal kawng siam mek endiknaah hian PWD Saitual Division EE leh SDO-te bakah Saichal, Pawlrang, Hliappui leh Changzawl VC aiawhte an tel a ni.