2403/2023-2024

2023 Khuangchawi thla ni 20: Vawiin chawhnu khan Kolasib District Election Officer Pu John LT Sanga, 5-Kolasib (ST) Assembly Constituency Returning Officer ni bawk chuan Kolasib DC Conference Hall-ah thu thar theh darhtute kawmin, Mizoram Legislative Assembly Inthlanpui, 2023 buatsaih tura Kolasib District chhunga inpuahchahna kalpui mek chungchanga thil pawimawh hrang hrang a sawipui.

Kolasib DEO Pu John LT Sanga chuan MLA Inthlanpui 2023 buatsaih tur atana sawrkar official-te bakah, NGO, MPF, MJA leh political party hrang hrangte thawhpuinaah lawm thu sawiin, a bik takin thu pawimawh puanzar kawngah leh mipui zirtirna kawngah District MJA te thawhpuina chu hlu a tih thu a sawi a. Journalist-te chu thu lai la tak leh mipui tana pai nuam taka thu theh darh ṭhin tur leh a ṭha zawnga mipui zirtirna a tam thei ang ber thai lang ṭhin turin a chah a ni.

DEO chuan inthlan kaihhnawiha complaint leh report theh luhna tur Control Room a function reng thu leh election team hrang hrangte pawhin ṭha taka an mawhphurhna hna an thawh mek thu sawiin, Voters' Helpline (1950-toll free) leh cVIGIL app te ṭangkai taka hmang turin mipuite a chah a. Kolasib District chhunga assembly constituency pathumah chuh tuma hming pe lut mi 13 an awm tih sawiin, nomination an file lai chu cctv leh video-a thla lak vek a nih thu te, candidate-te'n inthlan campaign sensovah ₹ nuai 28 aia tam an hman a rem loh thu leh hemi pual liau liauva hman tur bik designated bank account a hrana an hawn vek a ṭul thu te, an chet velna leh senso te election buaipuitu lam aṭanga vil reng a nih thu te a sawi a. Candidate-te nomination chu October ni 21, 2023 (Inrinni) chawhma dar 11:00-ah endik a nih tur thu a sawi.

He hunah hian 4-Tuirial (ST) A/C-a Returning Officer Pi Melody Ngurthantluangi leh 6-Serlui (ST) A/C-a Returning Officer Pu Lalmuan Puia te chuan an constituency-a nomination luh dan an report a. Election Officer Pi Christina Lalmuanzuali chuan BLO-te leh ERO-te'n District chhunga polling station 89-ah te eng, tui thianghlim, inthiarna leh ramp mamawh a awm kim leh kim loh an endik vek tawh bakah, Sector Officer-te'n ṭum hnih an tlawh chhuak vek bawk tih sawiin, siam ṭhat leh thuam ṭhat ngaite thuam ṭhat mek a ni, a ti a. Nodal Officer for Postal Ballot Pi F. Lalnisai chuan election duty-te'n postal ballot-a vote an thlak theihna tur ruahman a nih thu leh kum 80 chung lam leh pianphunga rualbanlote tan postal ballot-a vote thlak theihna ruahman a ni bawk tih a sawi a. District MJA member-te aṭangin zawhna leh chhanna leh sawi hona hun hman a ni bawk.

He huna tar lan a nih danin, election duty turte aṭangin postal ballot-a vote thlak dilna, Tuirial bialah 160, Kolasib bialah 311, Serlui bialah 149 leh district dangah 180, a zavaiin dilna 800 a lut tawh a. Absentee voter aṭangin postal ballot-a vote thlak dilna 105 (senior citizen 83 leh PwD 22) a lut tawh bawk a, in lama vote thlak tur absentee voter-te hi mobile polling team-in an in lamah an kal chilh dawn a ni.

MLA Inthlanpui, 2023 lo awm turah hian Kolasib District-ah polling station 89 awmin, Tuirial bialah polling station 26, Kolasib bialah polling station 29 leh Serlui bialah polling station 34 a awm a. Pink polling station (hmeichhe hlang duty-na) hi Tuirial bialah 3, Kolasib bialah 4, Serlui bialah 3, a vaiin 10 buatsaih a ni dawn a. Intlar ngaih lohna (queless) polling station atan Kolasib Project Veng P/S chu ruahman niin, Chawngfianga Middle School chu Model Polling Station atan cheibawl mek a ni bawk a. Polling station 60% chu web casting ti tura ruahman a ni bawk.

Kumin Inthlanpuiah hian November ni 7, 2023 zing dar 7 leh tlai dar 4 inkar chhungin vote thlak a ni dawn a. Ruahman dan chuan electronic voting machine/voter verifiable paper audit trail te chu vote thlak zawh veleh strong room awmna Government Kolasib College-ah luhpuiin, vote chhiar a nih hma chuan sipaite'n an venghim dawn a. Strong room tur hi buatsaih mek niin, peih fel thawkhat tawh a ni.