Chief Minister Pu Lal Thanhawla chuan MLA te leh MP ten mipui rawng an bawlnaah tawp chin (pension) a awm ve theilo a ni a ti. He thu hi vawiina Assembly Conference Halla Former Legislators Association of Mizoram (FLAM) in kum 20 an tlin lawmna a hmanpuinaa a sawi a ni.

Chief Minister chuan politics hi eizawnna leh sum siamna atan a nilo tiin, politics chu Pathianin mipui te tana rawngbawlna tura a hmanrua atana min pek a ni a ti a. Chutiangin amah ngei pawhin retheih inhuama politics atanga mipui rawng bawl tura inpe a nih thu a sawi a, nupui a neih dawn pawha retheih inhuam tura a chah lawk thu a sawi a ni.Pu Hawla chuan eng hna pawh thawk ila, kan awmna theuh hi Pathianin a rawngbawl tura min dahna a ni a, chuvangin taima taka rinawmna leh dikna nen tui taka thawk mai tur kan ni a ti a. Amaherawhchu tuna kan kal danah hi chuan tlemte thawh a a tam thei ang ber lakluh kan tumna ah te, ringtu ni si a vantlang tana hnawksak nih hreh miah lona te, kuttling loa sum lak luh hreh miah lohna te hian a tih beidawn chang a awm thin a ni tiin, beidawng thiang kan ni silo a ti a.In siam that hi kan zavaia mawhphurhna a ni a ti.

Sum enkawl chungchangah Pu Hawla chuan kan sum neihte hi enkawl thiam loh tham a awmlo tiin, sum harsatna hi India ram pumah a thleng vek a, a ziaawm pawl kan ni a ti a. Central sorkarah sum tam tak haichhuah tur a awm thu sawiin, haichhuah tum erawh kan vang hle a ni a ti a. Sorkar dik leh tha, langtlang leh mawhphurhna la ngam sorkar chak, mipuite mamawh pe thei leh sorkar nelawm kan siam theihna turin sorkar department tinte Secretary hnenah ruahmanna pasarih tal thawhkhawm tura a hriattir thu sawilangin, Chief Minister chuan ruahmanna an thehluh te chu tha thawkhata a hriat thu leh a hmawr bawkna la neih tur a ni a ti a.

Chief Minister chuan ramri chinfel chu thil harsa a nih thu sawiin, Assam hian a thenawm state te nena ramri buai an neihte chu an chingfel theilo vek a ni a ti a. Central sorkarah boundary commission din tura an thlen thin thu a sawi bawk a. India rama chi leh chi inthliarna awm thin a veizia thu sawilangin, Pu Lal Thanhawla chuan hei vang hian central hotu thenkhatte phei chuan min haw thin a ni a ti a. Hmarchhak mite hi India khua leh tuiah min pawmlo em ni tih tea zawhna a zawh let thin thu leh Kristian leh Islam sakhuate hi India Sakhua anga an pawm loh chuan chi leh chi inkara innghirnghona a chhuah reng theih thu a sawi thin te pawh a sawilang a ni.

Chief Minister hian lehkhabu “Good Governance - Politik Siam Thar Lehna Part II’ tih Prof JV Nunchunga, Govt J.Thankima College ziak chu tlangzarhin, he lehkhabu behchhan hian seminar neih nghal a ni.

FLAM hi MLA leh MP lo ni tawhte intelkhawmna pawl a ni a, ni 25 October 1994 khan din a ni a. Vawiin thleng khan member 101 awmin. associate member (Member thi tawhte nupui) 37 an awm bawk a. Hruaitu hmasa MP 5 leh MLA 57 te chu an boral tawh a ni.

FLAM inkhawmna leh Seminar hi an President Pu K.L.Rochama’n a kaihruai a ni.