3792/2024-2025

Dated Hnahthial, the 14th January, 2025: Vawiin khan Hnahthial District Hockey Association (HDHA) in MLA Running Trophy Hockey Tournament, hmeichhia leh mipa tana an buatsaih chu final khelha kharna hun hman a ni a. He hun hi South Tuipui bialtu MLA, Pu Jeje Lalpekhlua chuan khuallian niin a hmanpui a ni. 

Khuallian, Pu Jeje Lalpekhlua chuan hun rei tak Hnahthiala Hockey Tournament buatsaih a nih tawh loh hnuah Hnahthial District Hockey Association te thahnem ngaihna avanga tournament buatsaih a ni leh thei ta chu lawmawm a tih thu a sawi a. Hockey hi infiamna, eizawnna atan pawh a hmantlak tak anih avangin kan chawi lar thar leh a tul a ni tiin tunah pawh Hnahthial District nula engemaw zatin eizawn nan an hmang mek thu a sawi a. Midang, Hockey tui te pawh tan la zel a turin a fuih nghal a. Eng kawng pawh zawh ila, hlawhtlinna chang tur chuan kan tlo a, tih takzeta kan beih a ngai a ni tih kan hriat reng erawh a tul a ni a ti.

Pu Jeje Lalpekhlua, MLA chuan sorkarin infiam mite a ngaih pawimawh thu sawiin thingtlang kilkhawr ber thlengin talent haichhuah kawngah hma a la dawn a ni a ti a. Puihtlak ni turin a bial mipuite pawh an lo inbuatsaih a tul thu sawiin phai leh hmun danga khel turin sap tawng bakah Hindi kan thiam a tul a ni a ti bawk. YouTube lamah pasaltha chanchin chauh ngaithla lova tawng kan lo zir te pawh a tul a. Zuk leh hmuam, ruihhlo laka fihlim turin kal khawm mipuite a chah bawk a ni.

HDHA Secretary report danin tun tum hi kum sawmpanga (15 years) hnua Hnahthiala Hockey Tournament an buatsaih leh hmasak ber a nih thu sawiin tournament an siam theihna atana bul tumtu, bialtu MLA, Pu Jeje Lalpekhlua chungah thinlung takin lawmthu a sawi a ni. 

Final-ah hian Hmeichhe lamah Electric leh Tuipui 'D' te an inkhel a. Hun pangngaiah 2-2 a an inhnehtawk avangin penalty hmanga chak zawk zawn a ni a. Tuipui 'D' hian hnehna changin an champion a ni.

Mipa lamah Electric North 'A' leh Peniel ten an khel a. Hun pangngaiah 1-1 a inhneh tawkin penalty hmang bawkin chak zawk zawn a ni a. Electric North 'A' hian hnehna changin an champion bawk a ni.

He tournament-ah hian hmeichhe lamah Lalrinfeli Pautu chu Top Scorer niin Best Player atan Lalawmpuii, Tuipui 'D' thlan a ni a. Mipa lamah top scorer, Roluahpuia, Electric North niin Best Player atan F. Zoremsanga, Electric North thlan a ni bawk.