1237/2026-2027

Dated Khawzawl, the 30th June, 2026 : Vawiin khan Khawzawl District Football Association General Body Meeting chu Hlunbuang Picnic Spot, Khawzawlah neih a ni a. Hun hniha then niin, hun khatnaah rorel inkhawm neih a ni a, hun hnihna chu MLA Pu Jeje Lalpekhlua’n khuallian niin a hmanpui a, DFA Sr. Vice President Pu Robert Lalthlamuana’n a kaihruai.

Khuallian Pu Jeje Lalpekhlua chuan vawiin Khawzawl DFA General Body Meeting-a sawm a ni chu lawmawm a tih thu a sawi a. MFA leh DFA hotute kaihhruaina leh theihtawp an chhuahpuina zarah Mizoram inkhelmi tam takin football hi eizawn nan an hman theih phah a ni, a ti a. Vawiin program hi hun khawhral mai mai nana buatsaih a ni lova, Mizoram piah lamah India tana thukhawm an nih thu sawiin, DFA thutkhawm hi kawng engkima a bultantu leh a sulsutu, heta an rorel hian national level thlenga nghawng a neih thu a sawi a. Khuallian chuan tournament-a lawmman sum tam tak dawn aiin tournament-in inkhelmite a zilhna leh a thununna chu a hlawkthlak zawk thu a sawi a. Naupang leh thalaite zuk leh hmuam leh ruihtheih thil laka an fihlim theih nan Durtlangah tournament buatsaih an tum mek thu tarlangin, sports lama hruaituten harsa taka Tournament an lo buatsaih thin chu fakawm a tih thu a sawi a. Inkhelhna lama kan intehna tur chu veng emaw district champion nihna chauh ni lovin, kan district atangin national team te, ISL-ahte mi engzat nge tel tih zawk hi a ni, a ti a. Vawiinah Khawzawl atanga player tha tak tak chawimawina hlan tur an awm chu lawmawm a tih thu sawiin, nakumah chuan hei aia tam an awm a beisei thu a sawi bawk.

MFA Jt. Secretary Pu Lalrawngbawla leh Khawzawl DFA President Pu Lalnunenga te hnen atangin thusawi ngaihthlak a ni a. Vawiin program-a chawimawina dawngte chu a hnuaia tarlante an ni -

1. Lalkhawngaiha : Narayanpur, Chhattisgarh-a U-20 Swami Vivekanamda Men’s National Football Championship 2026 neihah Silver Medal a la

2. Lalhruaitluanga Kawlni : Narayanpur, Chhattisgarh-a U-20 Swami Vivekanamda Men’s National Football Championship 2026 neihah Best Goalkeeper a la

3. Lawmsangzuala : Colombo, Sri Lanka-a SAFF U-17 Men’s Championship neihah India aiawha telin a champion pui

4. Guite Vanlalpeka : ISL 2025-26 season-ah East Bengal FC Champion

5. F. Lalchhanchhuaha : 79th Senior Men’s National Football Championship for Santosh Trophy 2025-26 ah Mizoram team-ah a tel

6. Lallawmpuia : Amritsar, Punjab-a Junior Boys’ National Football Championship for Dr BC Roy Trophy neihah Mizoram tan a khel

7. Victor VLMS Dawngzela : Amritsar, Punjab-a Junior Boys’ National Football Championship for Dr BC Roy Trophy neihah Mizoram tan a khel