2032/2022-2023
Aizawl 23rd September 2022: PRS Legislative Research, New Delhi-in state hrang hrang MLA te tana a buatsaih 'National Workshop for State Legislators', September ni 22 &23, 2022 a neihah Mizoram atangin MLA 6:
1) Pu H.Biakzaua,
2) Dr K.Pachhunga,
3) Er. H.Lalzirliana,
4) Dr Vanlaltanpuia,
5) Pu L. Thangmawia
6) Pu K.Laldawngliana te an tel.

He Workshop ah hian thupui hlawm lian tak tak – Environment issue, Healthcare leh State Finances bakah GST leh Budget kalphung chungchangte zir ho a ni.

Covid-19 hripui leng avanga Central sawrkar leh State hrang hrang ten sum leh pai lama harsatna an tawh dan pawh zir ho a ni a. Covid-19 hripui leh lockdown avanga state hrang hrang ten sum an puk belh dante zir ho a ni bawk a. Hripui len hmaa GSDP atanga State sawrkar te tana bat phal (fiscal deficit) zat bituk 3% pawh hripui len hnuah tihpun a nih thu leh 2020-21 ah 5% leh 2021-22 ah 4% a tihpun a nih dante sawilan a ni a. India ram state zingah GDP% atanga tehin Punjab-in leiba an ngah ber thu leh Mizoram chu India ram state zinga leiba nei tlem ber pawl a nih dante a lem (figure) nen an rawn tarlang bawk.

Hriselna (Health) lam atana National Health Policy in target a siam aia tlem deuh vek state zawng zawngin sum an hman thu te, Khawvelin Environment issue a buaipui zual zel a tul thu te ngaihthlak leh sawiho chhunzawm a ni bawk.

State hrang hrangin budget-a sector hrang hrang tana sum an dah dan te zir ho niin 2021-22 a India ram state zawng zawngin Education Sector atana an sum dah chawhrual (Aggregate) chu 15.2% anih laiin Mizoram bik chuan 17% a dah thu te, Agriculture & allied sector-ah State hrang hrangte chawhrual 6.2% a nih laiin Mizoram chuan 8.1% a dah thu te, Energy ah State te chawhrual 4.4% a nih laiin Mizoram 6.6% a nih thu te, Police-ah chawhrual 4.3% a nih laiin Mizoram 6.3% a nih thu te, Urban Development-ah chawhrual 3.6% a nih laiin Mizoram ah 4% a nih thu te, Water Supply and Sanitation-ah chawhrual 2.8% a nih laiin Mizoramah 4.4% a nih thu te a lem(figure) nen hrilhfiah a ni bawk.

He Workshop a sawihona hunah hian Mizoram atanga tel MLA te chuan Mizoram state bika thil thleng leh India ram pum huapa rawtna an neih te thawh ve zelin Environment kaihhnawih sawihonaah hian Dr. K. Pachhunga’n Mizorama NHIDCL kawnglaih chu hmasawnna lawmawm tak a nih rualin Environment leh kuthnathawktute tana a nghawng tha lo sawichhuakin hemi kaihhnawiha dan leh hrai awmte a zawtfiah a, State hrang hrang leiba chungchangte pawh zawhfiah niin Mizoram chu India ram state zinga GDP% a tehin a ba tlem pawl a nih avangin Mizoram sawrkara Finance Department lo enkawl tawhtu zawng zawngte leh tuna enkawl mektu te thawhrah a lang chho mek zel niin MLA te hian an hria a ni.

He Workshop-a MLA te an kal theihna tur hian Mizoram Legislative Assembly Secretariat-in hma lain heng MLA 6-te hi Pu Lalthangmawia, Deputy Secretary, Mizoram Legislative Assembly-in a tul apiang buaipuiin a tawiawm a ni.

Attachment

  • Loading attachment...