No.3529/2020-2020

Vawiin khan Health Minister Dr R.Lalthangliana chuan mobile food testing laboratory (Food Safety on Wheels) chu MINECO kawtzawla programme tawi buatsaihah mipui hman theih turin a tlangzarh.

Health Minister chuan mipui tana ei leh in him leh tha hralh chhuah leh pek chhuah a nih theih nan food testing hi thil pawimawh em em a ni a, hmun kilkhawr zawk pawh thleng thei, kawng dunga thingpui dawr leh hotel-a eitur siamte a him tawk em tih enfiah zung zung theihna tur mobile food testing laboratory hman theih a ni ta chu lawmawm a ti a. Ei leh ina fimkhur a tulzia sawiin tui tak leh hrisel tak nia lang, mihring nunna pawi thei a awm thin tiin Dr R.Lalthangliana chuan kan ei turte a thianghlimin a hrisel tawk em tih uluk taka enfiah tura hmun hrang hranga kalkual thei Mizoram Sawrkarin a nei ta chu tangkai taka hman a nih a beisei thu a sawi a ni.

Central Sorkar chuan ei leh in thianghlim leh tha a ngaih pawimawh avangin kum 2016-17 khan “Strengthening of Food Testing System” a kalpui tan a. Chu mi kal zelah chuan Central hnuaia Food Testing Laboratory awmsate thuam that a nih bakah engemaw zat din thar a ni bawk a. State Sawrkar-te pawh Food Testing lamah nasa zawka tan la turin a hriattir a. He hmalaknain a ken tel pawimawh tak chu Mobile Food Testing Laboratory (MFTL) a ni. Mobile Food Testing Laboratory (MFTL) hi ‘Food Safety On Wheels’ tia sawi a ni bawk a. He Scheme hnuaiah hian FSSAI chuan India ram puma hman turin MFTL 62 a ruahman a. Mizoram pawh pahnih (2) pek tur zingah telin tuna tlangzarh tak bakah pakhat dawn belh leh thuai beisei a ni.

Mobile Laboratory hi khawl (basic infrastructure) famkim thei ang bera thuam a ni a. Food products chikim test theih ni lo mah se, nitina ei leh in mamawh zualpui test theih tura ruahman a ni. MFTL hi ei leh in chungchanga hmun kilkhawr zawk thlenga Training & Certification Programme leh Awareness pekna hmanrua atan hman tangkai theih a ni bawk.

Mobile Food Testing Laboratory (MFTL) hi Scheme Guidelines-in a sawi angin Technical Officer, Analyst, Attendant leh Driver ten an enkawl dawn a. Sample test theihte chu :- bawnghnute leh bawnghnute atanga siam ei tur chi hrang hrang, tel, sweets & confectionaries, cereal & cereal products, spices & powders, thei leh thlai, thei tui (beverages) te a ni.

Vawiin programme hi Health Secretary Pu H.Lalengmawia’n a kaihruai a. Joint Director (F&D) Pu Lalsawma’n technical report a pe a ni.