2587/2024-2025

Dated 18th October, 2024 : Nimin 17.10.2024 (Ningani) chawhnu dar 1:00 Pm khan Information & Communication Technology (ICT) Department leh Telecom Service Provider (TSP) leh veng thenkhata Local Council (Chaltlang, Durtlang, Kulikawn, Bethlehem, Ramthar, Tuikhuahtlang, Bethlehem Vengthlang) te chuan Mobile Tower chungchanga leh mipuite harsatna chungchang an sawiho a.

He meeting ah hian Dr. Lalthlamuana, Chief Informatics Officer (CIO), ICT Department chuan thu sawiin, tunlai khawvelah chuan mobile tel lovin kan awm theih tawh loh thu leh engkim mai (lei leh hralh, fee leh bill pek, sorkar dawr adt.) chu kan mobile kaltlanga tih a nih tawh thu a sawi a. Hei vang hian ICT department chuan mitin ten mobile signal tha kan nei theih a duh a, TSP te pawh theihtawpin an service ti chak turin a nawr reng thin a ni. Mobile signal tha tur chuan Mobile tower kan neih tam a ngai a, TSP ten tower dahna tur an van thin mai bakah thenawm khawveng atanga harsatna a awm thin avangin mobile tower/pole dahna tur hmun an van thin thu ngaihthlak a ni bawk.

Dr. Lalthlamuana, CIO chuan mi tlemte in Mobile Tower in Cancer natna a thlen thei ti a proof awm lova an sawi thin avangin mipui tam tak a ti chi ai thin tih sawiin, heng thu belhchiandawllo hi mipuite chu ringlo turin a chah a. World Health Organization (WHO) leh Organization rintlak tak tak te pawhin research tam tak an bei tawh a, a inlaichinna an la hmu lo a ni a ti. India ramah hian Sap ram te ai daihin Mobile Tower siam danah hian an strick zawk a, chu mai bakah Telecom Regulatory Authority of India (TRAI) te hian Mobile tower te hi a khat tawkin an check ve reng thin a ni. 

Kal khawmte chuan Mobile Tower leh Radiation chungchanga kan hriat dan dik tawh lote siamthatna turin leh kan hriatchian zawk theihna turin mithiamte nen Talk Show emaw Awareness campaign nise tih ani bawk.