2905/2025-2026

Saitual, 14th January, (Nilaini) : Vawiin khan lirnghing lo thlen thulha chet lak dan zirna State Level Mock Exercise on Earthquake Disaster naktuk January ni 15 (Ningani) a neih tur chungchangah Saitual district-a he nunchan kalpui dan tur Pu Lalawmawma Addl DC Saitual kaihhruaiin a Office chamber-ah Press Briefing neih a ni.

Addl. DC Pu Lalawmawma chuan Mizoram chu lirnghing avanga chhiatna thlen theihna sang tak Zone V a awm a ni a, mithiamte zir chianna ațangin a aia sang, Zone VI-ah rin luh chang te pawh an nei a ni, a ti a. Hetiang hi kan ram dinhmun a nih avangin DM&R Department ruahmannain District tinah nunchan zirna hi buatsaih țhin a ni, a ti.

Addl. DC chuan chhiatna lo thleng thut se, Sawrkar, NGO leh mipui mimir hian chet lak dan kan zir tlan a țul a, rikrum thil a nih avangin inzirna ang diak diak chuan a hunah thil tih theih a ni kher lo maithei, chutih rualin hetiang ang nunchan kan lo zir fo chuan hamhaih lutuk lovin kan lo hmachhawn phah thei a, tih tur leh tih loh turte kan hriat phah dawn a, heng kan thil zir hi hlawkthlak leh chhawrnawm tak tur a ni ang, tiin a sawi bawk.

He nunchan zirna hi Saitualah chuan naktuk Jan 15 (Ningani) hian khaw en laiin hmun thum Govt Saitual College, Keifang Bazar leh District Hospital-ah te kalpui tur a ni dawn a, zan tirah Keifang Melveng Bazar-ah nunchan zirna hi kalpui a ni bawk ang. Heng atana mawhphurtu bikte pawh ruat chhuah fel vek tawh niin, Observer leh Incident Commander te an pawimawh tur thu a sawi bawk.

Vawiin Press Briefing-ah hian Pi F. Zodingpuii, DIPRO Saitual bakah Saitual District MJA member te an tel a ni.