Vawiin chawhma dar 11:00 khan Serchhip DC’s Meeting Room-ah “District-level Committee on Saansad Adarsh Gram Yojana (SAGY)” chu an Chairman, District Bawrhsap Pi Juhi Mukherjee, IAS hovin Serchhip District chhunga Mizoram Lok Sabha leh Rajya Sabha MP ten model village ni tura an puan Khawlailung leh Chhiahtlang khua a hma lak tan dan tur ngaihtuahin an thukhawm.

Chairman Pi Juhi Mukherjee chuan committee member kalkhawmte chu an hmalak dan tur leh hmachhawp siam dan tur te sawipuiin he Scheme tharin a phut angin an Department hnuaia hmasawnna hna thawh emaw ruahmanna siam emaw anih in heng model village atana puan khaw hnihte hi an rilru ah dah pawimawh hmasa ber zel turin a hriattir a, Department hrang hrangte an thawhho a tul hunt e a la awm dawn avangin tun atanga ruahmanna felfai tak neih lawk a tul thu a sawi a, hun bituk chhunga hnathawh tur chin siam sa anih zel avangin inthlahdah hman anih dawn loh thu a sawi bawk a ni.

Vawiin thukhawmin thil pawimawh hrang hrang a relte zingah District chhunga SAGY Charge Officer atan Pi Teresy Vanlalhruaii, MCS, Project Director, DRDA Serchhip an ruat a, SAGY kaihhnawih Department tin ten heng khaw pahnih vil tur bik an mi leh sa pahnih theuh an ruat bawk a, Khawlailung vil tur team te hi SDO(C), North Vanlaiphai in a kaihruai ang a, Chhiahtlang vil tur team hi Serchhip BDO in a kaihruai thung ang.

Ruahman lawk dan chuan Department tin te hian kumthar January thla chanve ral hma in heng khaw pahnih ah te hian hna bul an tan vek dawn a, chung zingah chuan Anganwadi Centre zawng zawnga Health Camp buatsaih te, Animal Health Camp buatsaih te, Grievance Redressal Programme buatsaihte pawh a tel a ni.