Vawiin 4.6.2019 chawhma dar 11:00 khan Dawrpui Multipurpose Centre-ah Modern English Higher Secondary School HSLC & HSSLC Results, 2019 Lawmna hun Sports Minister Pu Robert Romawia Royte-in Khuallian niin a hmanpui.

Minister chuan Modern English School chu Mizo hnam tan a hlu hle, hun rei tawh tak atangin Level hrang hrangah Result tha tak an nei kum tin thin. School Management te, Principal, Staff zawng zawng leh Zirlaite a lawmpuiin duhsakna a hlan.

Cl-X leh XII pass tharten Level tharah bul an tan mek laiin “a bul tan that chu a chanve zo ang a ni” tih a nih avangin bul tan laiin thawhrim a pawimawh a, ti tak taktute an hlawhtling thin a ti.
Pathian Lehkhabu, Genesis-a kan hmuh angin Pathianin naupangte chu nu leh pa thuawih turin thu a pe a, chu thupek chu khawvel thila thupek nen a danglam daih; thupek tiam nei a ni. Nu leh pa thuawih hi naupangte tihtur a nih thu uar takin zirlai a fuih.

Pu Robert Romawia Royte chuan zirlai te chu Social Media hman danah chintawk neih tul a tih thu te, Social Media hi thudik hriat zawng zawng post-na hmun tur a ni lova, tangkai zawnga hman thiam a pawimawh a tih thu a sawi bawk.

Minister chuan Aizawl East-II bialtu MLA a nih angin he bial hmasawn nana pawimawh chu ZIRNA THA a ni tih ka hria a, zirna tihhmasawn nan theih tawp a chhuah tur thu leh Academic Session tawpah Aizawl East-II bial chhung sikul zawng zawnga Cl-I to Cl-XII a class tin Toppers te pualin TOPPERS’ DAY ropui takin buatsaih a, Lawmman tha tak tak Toppers zawng zawng pek a tum thu a sawi.

Sports Minister chuan Mizote chu India rama hnam fit ber leh Mizoram chu India rama State fit ber ni turin tan lak mek a nih thusawiin Mizoram sports hmasawn nan National Games, Asian Games leh Olympic Games tinzawna sports discipline hrang hrang huap kim zawnga hmalak tan mek a nih thu a sawi.
    
Aizawl East-II bialtu MLA leh ICT Minister ni bawk hian Modern English School Hall-ah Ceiling Fans siamsak a tum thu leh ICT Deptt kaltlanga Computer set 7 pek an nih tur thu a hrilh a ni.

Territorial Commander Lalzamlova chu khual zahawm niin fuihna leh lawmpuina thu tha tak a sawi bawk.