Nimin (Pathianni) khan Ministry of Road Transport and Highways (MoRTH)-a Special Secretary & Financial Adviser Pu Shambhu Singh, IAS chuan Lawngtlai tlawhin, Lawngtlai-III-a National Highway-54-in a pal tlang lei tlak hniamna lai leh Kaladan Multi-Modal Transit Transport Project (KMMTTP) kawngpui sial mek te a enfiah.

Pu Shambhu Singh hian chawhma lamah helicopter hmanga Lawngtlai thlengin, helipad-ah Lawngtlai East bialtu MLA Pu H. Biakzaua leh Lawngtlai Bawrhsap Pi Shashanka Ala, IAS te leh official pawimawh dangte'n an lo dawngsawng a. Lawngtlai East bialtu MLA chuan Lawngtlai-III lei tlak hniamna laia national highway a pin avanga Lawngtlai leh Siaha District mipuite'n an tawrh nasat zia hrilhin, he lai hmun hi tlawh turin a sawm a. MLA sawmna ang hian Lawngtlai-III lei tlak hniamna lai chu tlawh hmasain, MoRTH Special Secretary chuan chu laia harsatna thleng chu a theih anga enzui a tum thu a sawi.

Hemi hnu hian MoRTH Special Secretary chuan KMMTTP kawngpui sial mek chu AOC Veng atangin Myanmar ramri thlengin a en a. PWD leh kawng sial hna thawktu Company-te'n harsatna an tawh thin, lei min nasa lutuk thin chu a hmunah enpuiin, he lai kawngpuia lei pariat dawh tur pawh a thlir bakah, India leh Myanmar inrina laia lei dawh kai tura ruahman te a en bawk.

MoRTH Special Secretary & Financial Adviser Pu Shambhu Singh hi KMMTTP kawngpui a tlawhnaah hian Lawngtlai Bawrhsap Pi Shashanka Ala leh PWD hotute'n an tawiawm a. KMMTTP kawngpui sial meka hma lak chhunzawm tura tul leh pawimawh hrang hrang chu Delhi a thlen thlak hunah a tul anga lo enzui nghal a tum thu a sawi.

 

MoRTH Special Secretary hi nizan khan Lawngtlaiah riakin, vawiin khan Lawngtlai a chhuahsan.