No.773/2021-2022

Siaha; 1st June, 2021: Vawiin chawhma dar 10:00 AM atang khan  Dr.K.Beichhua, Minister of State for SWD, AH & Vety etc. chuan Tipi Ferry, Riasikah, Amotlah leh Thiahra khuaa VLTF duty te tlawhin, an huam chin theuhva Covid-19 lockdown avanga chhungkaw harsatna tawkte  chhawmdawlna tur sumfai Rs.10,000/- leh Buhfai quintal 1 theuh a  MLA Fund atangin a hlan hlawm.

 Minister hian Saiha-Romibawk-Phalhrang (32.05Km) PMGSY Road (Pavement works) hnathawh mek chu a hmunah a enfiah nghal a ni.

Vawiin VLTF duty te a tlawhnaah thu sawiin, Minister chuan VLTF ten theihtawp chhuaha, an mahni khua theuh Covid-19 hrileng laka an him theih nana an thawhrimna leh inpumpekanaah lawmthu sawiin, Covid-19 inkharkhip avanga harsatna tawk chhungkua te an lo chhawmdawl tawhnaah lawmthu a sawi bawk. Minister chuan  MLA Fund hi mipui sum a ni a, a tulna apiangah kan hmang zel ang. Kei Minister hi chhuanchhama ka awm hma loh chuan, tumah chhuanchhamin in awm bik lo vang, lo thlaphang suh u, tiin; Minister chuan Covid-19 hri laka invenna dan tha ber chu mahni lo mi dang zawng chu Covid-19 +ve -ah ngaih vek hi a ni,  a ti a; tun ang hunah chuan lo/ram lama hnathawha tawm bo vek hi chhungkaw intodelhna leh himna a ni, a ti bawk.

Vawiinah vek hian Minister hian Tisòpi lui lei thawm that dan tur a hmunah enfiah nghalin, a thawmthatna tur MLA Fund atangin Rs.1,00,000/-a ruahman nghal a ni. Tisòpi lui hi Siaha leh Tipi Ferry inkara awm a ni a, Furah chuan he Lei zawh chauh hian Tipi Ferry, Riasikah, Amotlah leh Thiahra khua te hi a tlawhpawh thei a ni.

Tisopi lui Lei hi tunhma chuan RCC Cantilever-a  siam a ni a. Kum 1995, Siaha district minpui kum khan tuilianin a la daih a. Khata tang khan  kum tinin Seasonal Bridge (Thing Lei), Motor te zawh theih chang changa siam thin a ni. Kumin Furpui hmachhawn thei turin naktuk atangin a thawm that hna hi an thawk tan  dawn a ni.