Pu Lal Thanzara, Minister of State chuan vawiin khan a office ah Lengpui Airport panna lei Bailey Bridge motor in a zawh chim chungchang leh Rangvamual a leimin chungchanga thil awmdan a sawi.

Minister chuan Rangvamuala kawngpui an a mimal ram laih avanga nasa taka leimin thlengin motor kawngpui a tihpin thin chungchangah Deputy Commissioner ho a enfiah anih tawh thu sawiin, helai ram neitu hian kawng hi engtik lai pawhin a thianfai reng tur a ni a, hemi avanga lei hi min belh a awm pawhin thianfai nghal zel tura tih a ni a ti. Leimin in mi tam tak tana harsatna a thlen chu pawi a tih thu a sawi a ni.

Sihhmui bula bailey bridge motor lianin a zawh chim changchang pawh sawiin, lei kilhna rukbo thin anih avanga a nghehna tih derthawn ina chhiatna hi thleng ta a ni a ti a. Lei kilhna part rukbo hi hmuhchhuah a ni a, May 2014 khan transom clamp 80 lai thlak a ni a, July thla khan FIR pawh thehluh anih thu a sawi a. FIR thehluh hnu hian transom clamp 80 bawk thlak leh anih thu sawiin, spot welding ti nghalin, lei a chim hian 46 a bo leh hman a ni a ti.

Lei chim hi tunah hian bailey bridge hman tawh loh hmun hrang hrang atanga la khawmin a siam that hna thawk turin hma lak nghal a ni a ti a. Kumin chhung hian siam zawh hman hram tum a ni ang a ti. Minister chuan tuna lei chim ta bula RCC a dawh tum mek hi a innghahna lung tuiin a eiheu (erode) avangin rin ngam a nih chiah tak loh avanga a siam hna chawlhsan a ni a ti a.A in nghahna leilung hi zirchiang tura Consultant ruai tura tender chhuah mek a ni a ti.