Vawiin khan Minister of State Pu C.Ngunlianchunga hovin ama office chamber-ah ni 26-28 September, 2017 inkara Chawngte-a Higher Secondary School Sports neih laia boruak duhawmlo thleng nghawng kalzel chungchangah meeting neih a ni a. He meeting hi MoS Pu C.Ngunlianchunga-in a kaihruai a, Tuichawng bialtu MLA Dr.B.D.Chakma bakah CADC-a MDC 3, Chakma House LO & Asst. LO, Mizo Students Union (MSU) President, Office Bearers, Senior Adviser leh Adviser te, Aizawl City College Joint Students Union (ACCJSU) President leh Office Bearers te, Mizoram Chakma Students Union (MCSU) President leh Office Bearers te leh Young Chakma Association aiawhte an tel a ni.
Meeting kaihruiatu Pu C.Ngunlianchunga chuan meeting koh a nih chhante sawifiahin a sawmna ngai pawimawha a tel turte kim taka an lo kal thei chu lawmthu a sawi a. Tuichawng MLA Dr.B.D.Chakma leh MSU President Pu R.B.Malsawma te chu a bik taka thusawi turin a sawm a, chumi zawhah chuan pawl hrang hrang aiawhte an ngaihdan sawi tura sawm chhunzawm nghal a ni a. Ngaihdan hrang hrangte inpawh tlang taka sawiho a nih hnuah he meeting chuan a hnuaia mi ang hian Resolution a siam a ni :
1. Ni 26-28 September, 2017 Chawngte-a Higher Secondary School Sports laia Chakma thalai thenkhatten an tihbuaina nghawng kal zela buaina chhuak hi tha kan ti lova, kan dem hle a ni.
2. Hetiang thil hi tun hnuah thleng tawh lo se, a awm leh palh a nih pawhin Social Media-ah a punlun zawnga thehdarh a nih loh nan chak taka hmalak tlan ni rawh se.
3. He thil thlenga a mawhphurtu leh kut thawhtute hi thuneitu lamin darkar 24 chhungin lo chhuichhuak sela, dan angin hremna pe ngei rawh se.
4. Kut tuartu te dinhmun hi thuneitu lamin lo zirchiang sela, chhawmdawlna pek ngai an awm a nih chuan a tul anga chhawmdawlna pek ni rawh se.
5. Bangladesh atanga dan lo a foreigner lo lut te dapchhuah kawngah hmalak ho thin ni rawh se.
6. Mizo Students Union (MSU) leh Aizawl City College Joint Students Union (ACCJSU) ten Chakma House, Hunthar Veng, Aizawl-a mikhual thlen an phalsak loh chu hawn leh phalsak nghal nise.
