610/2026-2027

Kolasib, 20th May, 2026: Vawiin khan DC Office Chamber, Kolasib-ah Mother's Day pualin District Hub for Empowerment of Women (DHEW), Women & Child Development (WCD) buatsaihin nu chhuanawm te chawimawina hun hman a ni. He hun hi Pi Lalnunpari Hmar, District Programme Officer i/c, WCD chuan a kaihruai a ni.

He hunah hian Kolasib Deputy Commissioner Pu H. Dolianbuaia chuan thusawina hun hmangin, tunlai khawvela fa enkawl seilen a hautak zia leh harsat ziate a sawi a. Tunlai hunah chuan thalaite zingah ruihtheihthil ti lo ringawt pawh fa fel nia ngaih theih an nih tawh laia, fa nungchang tha leh hlawhtling tak tak an chher chhuak thei chu ropui a tih thu leh lawmawm a tih thu a sawi.  Fate rual awhna tam tak karah  theihpatawpa an mamawh phuhru thintu, nu hmangaihna leh inpekna chu fakawm a tih thu a sawi bawk.

DC chuan, tunlai kan society-ah sualna tam tak a hluar mek a, chumi kara nu in fa hlawhtling tak a chher chhuak thei chu thil namai lo tak a ni a ti a. Hmeichhe tha leh tha lo tehfung hrang hrangte sawiin, chawimawina dawngtu nute chu hmeichhe tha leh entawn tlak an nih thu sawiin duhsakna a hlan a ni.

He chawimawina thilpek hi Kolasib district chhunga hmeichhia, pasal te tel lova fa hlawhtling tak tak enkawl seiliantu nu (single mothers) te hnenah pek a ni a. Chawimawina dawngtu te chu:

 1. Pi Nuzawni

 2. Pi K. Zosangliani

 3. Pi H. Lalsangpuii

Vawiina chawimawina hun hmanah hian MHIP Kolasib Sub-Headquarters hruaitute leh chawimawina dawngtu chhungte an tel a. He hun hi Pi Elizabeth Lalmuankimi, District Mission Coordinator, DHEW chuan lawmthu sawiin a khar a ni.