Tukin zingkar aṭang khan Lawngtlai District chhunga inthlannaa duty tur polling party nimin lama chhuak bak zawngin an duty-na tur polling station lam an pan leh a. Heti hian Lawngtlai District chhunga polling station 165-a duty tur polling party-te chuan an duty-na tur hmun ṭheuh an pan kim ta.

Polling party kal chhuak turte hian Govt Lawngtlai College-ah an bungraw mamawh turte la khawmin, EVM & VVPAT ken turte an enfiah a. Chumi hnuah an duty-na tur polling station ṭheuh panin an kal chhuak hlawm a. Polling party kal chhuak turte hi District Election Officer Pi Shashanka Ala IAS bakah, nodal officer-te leh sector officer-te'n an lo buaipui a ni.

Vawiina kal chhuakte hi polling station 62 awmna 36-Tuichawng (ST) Assembly Constituency-a duty tur nimina kal chhuak bak polling party 13, polling station 68 awmna 37-Lawngtlai West (ST) Assembly Constituency-a duty tur nimina kal chhuak bak polling party 37 leh polling station 35 awmna 38-Lawngtlai East (ST) Assembly Constituency-a duty tur nimina kal chhuak bak polling party 31, an zavaiin party 81 an ni. Vawiin hian Sector Officer la chhuak bakte paw'n an sector lam an pan ve nghal bawk.

Lawngtlai District-ah hian polling station 165 awmin, he'ng zingah hian hmeichhia chauh duty-na tur polling station pariat siam a ni a; chu'ngte chu - 37-Lawngtlai West huam chhunga mi vek niin, Saikah ‘U’, Saikah ‘L’, Chawntlangpui, Sihtlangpui, Kawlchaw ‘W’, Paithar, R. Vanhne leh Rulkual polling station-te an ni.

Attachment

  • Loading attachment...