Thingtlang khua te hmasawnna tura Sorkar Laipui hmalaknate (Rural Development Programmes) viltu District Level Vigilance & Monitoring Committee chu vawiin chhun dar 12 khan DRDA Conference Hall ah Co-Chairman Pu Lalhmingliana, MP (Rajya Sabha) hovin an thukhawm a.
Mahatma Gandhi National Rural Employment Guarantee Scheme (MGNREGS) - vantlang rotling siama mipui inhlawhna siamsak chungchangte, Indira Awaas Yojana (IAY) - mi harsa te in sak sak te, Swarjayanti Gram Swarozgar Yojana (SGSY) - thingtlang mi harsa te sum leh pai dinhmun chawikanna tura self help group tanpuina pek dan te, District Rural Development Agency (DRDA), Aizawl hmalakna te, Integrated Watershed Development Programme (IWDP) - leilet, tuikhuah, dil, tui lakna, tuizem, thingphun etc siama hmalakna te, Pradhan Mantri Gram Sadak Yojana (PMGSY) - thingtlang khaw kar kawng siamna te, Accelerated Rural Water Supply Programme (ARWSP) - tui in tur mamawh pek hna te, Total Sanitation Campaign (TSC) - inthiarna thianghlim siam hna te, National Social Assistance Programme (NSAP) - tar, hmeithai leh rualbanlote enkawlna chungchanga hmalak hrang hrangte an sawiho a. Mipui chawikanna tura Scheme hrang hrang hminga Sorkar Laipui atanga tanpuina sum tam tak lo kal thin te chu bawhzui a nih dan te ngun takin an thlir ho a, chak zawka hmalak zui zel dan te an sawiho.
Aizawl District pumah khaw 93 a awm a, MGNREGA hnuaiah kum 2011-2012 chhung khan Aibawk, Darlawn, Phullen, Saitual, Sakawrdai, Thingsulthliah leh Tlangnuam Block hnuaiah Job Card 24,477 pekchhuah a ni a, sum Rs 46,42,60,600 /- sen a ni. IAY hmingin In 218 sak thar nan Rs 1,05,73,000 /- leh In 176 thuamthat nan Rs 26,40,000 /- sen a ni bawk. Total Sanitation Campaign hmingin BPL chhungkaw 1520 tan ekin man tlawm siamsak an ni a, Anganwadi 45 tan ekin/inthiarna siam niin vantlang zunin 3 siam a ni bawk. Meeting ah hian thil dang pawimawh hrang hrang an sawi zingah Block Development Committee chu a nih dan tur leh kalphung dik taka kalpui ni se tih an rel bawk a ni.
Vawiin meeting ah hian MLA 4 - Deputy Speaker Pu John Rotluangliana, Govt. Deputy Chief Whip Pu R.L.Pianmawia, Law Commission Chairman Pu R.Lalrinawma leh Pu Lalduhoma te pawh an tel a, Aizawl District Deputy Commissioner Dr. Franklin Laltinkhuma leh officials dangte an kal a ni.
