Lok Sabha MP Pu C.L. Ruala’n SAGY Programme hnuaia Model Village a siam tur atana a thlan Khawlailung khua chuan an khua model village anih theihna tur atana hmalakna pakhat atan vawiin nileng khan an khaw ramri chin kawngpui sir ah thing tiak phun hnatlang an nei.

Thing tiak phun tura an kalchhuah hma hian Khawlailung kawnah vantlang inkhawm buatsaih a ni a, he hun hi Pi Teresy Vanlalhruaii, MCS, Charge Officer, Khawlailung Model Village chuan kaihruaiin thingphun tura khawtual mipuite thawhchhuahna ah lawm thu a sawi a, Sawrkarin thing hi a phun sak lova, anmahni ngeiin an khawtlang leh an tu leh fate lo awm zel tur tan thing an phun ani tih hria a, enkawl uluk turin a chah a, Model Village siamna rahbi hmasa atan anmahni thlangtu Lok Sabha MP in Rs nuaih 15 a sanctioned tawh thu leh hemi sum hian Khawlailung kawnah Bazar Building tha tak 50 ft x 12 ft a zau, chhawng hnih a sang sak anih dawn thu a sawi bawk a ni.

Thusawitu dang Pu Andrew H. Lalremruata, MIS, DIPRO pawhin Khawlailung mipuite chu anmahni duhsak taka thlangtu Lok Sabha MP tibeidawngtu a tang lo turin a fuih a, min hmangaihtu ten duhsakna tinreng min vur hian ngai ah neih palh a awl thin a, hei hian harsatna a siam thin ani tiin tunah hian khaw entawntlak (Model) an la ni rih lova, entawntlak a siam tum mek an ni tih inhria se a duh thu sawiin, an hmalak dan leh hmasawn dan zawng zawng te, Village Development Plan an bawhzui dan te a bul atang uluk takin record a nih dawn thu leh documentary film pawh siam anih dawn thu sawiin midangte hnena chhuang taka in khaw chanchin kan theh darh theih nan tan la ang che u tiin a fuih a ni. Thingphun enkawl uluk a pawimawh thu sawiin Mizoramah eng ni bikah emaw Sawrkar Department leh tlawmmngai pawl thenkhat ten thing tiak an phun thin a, amaherawhchu a hnu lamah enkawl uluk anih zui tak loh avangin a tam zawk an damkhawchhuak thin lova, tunah chuan khawtlang mipuiten an ramchinah an duh ang takin an phun dawn a ni a, uluk taka an vil zui a beisei thu sawiin abikin khawchhak lam atanga Bawng rawn tawlh thin te leh ram kang lakah venhim a tul lehzuala a hriat thu a sawi a ni.

SAGY kaihhruaina in a duhthusam ang takin vawiin thingphun hnatlang hi NREGS (DRDA), Environment & Forest, I&PR Department leh NRLM, East Lungdar RD Block ten convergence a an huaihawt a ni a; Khawlailung ram chin Tuichang Lui kai atanga Chekawn ramri thleng kawngpui dung tluanah thing hi phun tura ruahman niin naktukah pawh thing tiak phun hna hi chhunzawm leh a ni ang.

Vawiin thingphun hnatlanga tel tur hian mi 500 chuang an thawkchhuak a, pawl hrang hrang 11 ah in thendarhin phunna tur hmun an siam a, National Rural Livelihood Mission hnuaia Khawlailunga Self-Help Group 33 member ten khawchhung cheimawi hna an thawk bawk a, an ni hian khawlailung khawchhung hmun hrang hrangah bawlhhlawh bawm 33 an dah bawk a ni.

Pu J. Lalsawta, Range Officer, North Vanlaiphai hnen atang thing tiak phun dan dik inzirtirna hun hman a ni bawk a, tun tumah hian thing tiak 2000 phun tum niin heng thing tiak te hi Makpa Zang Kang, April, Chawmzil, Tespata, Tlaizawng, Silver Oak, Eucalyptus, Khawitur, Khuangthli leh Chawnpui/Thlado te an ni.