No.5776/2020-2021

Aizawl, the 5th October 2020: Vawiin chawhma khan Banquet Hall, Raj Bhavan-ah Mizoram Planning, Economics & Statistical Services(MPESS) tling thar te chuan Governor P.S. Sreedharan Pillai an kawm a. MPESS 2020 batch te hi an vain mi 6 an ni a; Dr Lalrinchhana, Director, Economics & Statistics, P&PID leh Senior Official ten an rawn tawiawm a ni.

Governor P.S. Sreedharan Pillai chuan Planning Officer thar te a kawmnah hian India hmarchhak tih hmasawnna atana India in 10% of Budget lai mai a dah hrang chu India Hmarchhaka cheng,mi tlem te, India ram mipui zinga 3.76 % zah awrh tan chuan tam tham tak a nih thu a sawi a. Hei hi project siamtute pawhin an hriatchian a ngai a, central atanga sum hailuh kawngah hian tun aia nasa zawka tan a ngai a ni a ti. Sawrkar hna hmu thar te an nih anga a lawmpui thu sawiin Sawrkar hna ringawt lo deuh ngaih pawihmawh a tul tawh tih a sawi a. Governor chuan Mizoram leilung te chu thlai chikimin a ngeih em em vek a nih thu a sawi a. “Ei leh barah hian kan intodelh pumhlum thei rih lo deuh a nih pawhin kan mamawh zualpui te hi chu kan thawk chhuak thei tih a chiang a. Ei leh bara intodelh tur hian thinlung lamah lo inpuahchah hmasak a ngai thin a. Kan state chhunga kuthnathawh kan hreh laia state pawn lamah kuthnathawka eizawng kan nih leh si chuan insiam that a ngai dawn a ni”, a ti. Agriculture & Allied Sector huanga kuthnathawh thlah daha sawrkar leh company hna thawh ringawt tum chu midangte thawhchhuahsa hmanga in hraipuar a ngai leh thin a; inhmuhthiamloh nikhua te pawh awm thei tho a ni a, a him ber lo a ni a ti a. India in a thil tum intodelhna – Atma Nirbhar Bharat nei tur hian kawng engkimah rualkhai taka tan kan lak chhoh zel a ngai a; kuthnathawh hmanga ei leh bara intodelhna te pawh kan ngaih pawimawh viau a ngai a ni a ti.

MPESS 2020 batch tan hian kar 2 chhung Orientation Programme buatsaih a ni a. Orientation Programme of MPESS 2020 batch hawnna hun chu vawiin chawhma dar 10 khan P&PID Conference Hall-ah neih a ni a. Dr. C. Vanlalramsanga, Commissioner & Secretary, P&PID leh Senior Officials, P&PID ten he hunah hian fuihna thu an sawi a ni.