No.6137/2020-2021

Aizawl, the 16th October 2020 : MPE & SS Orientation Programme kar hnih chhung (5th-15th October, 2020) neih chu nimin khan Aijal Club ah kharna neih a ni a. Dr. C. Vanlalramsanga, Commissioner & Secretary, Planning & Programme Implementation Department in a hmanpui a, he hunah hian Annual Report of Births & Deaths 2019 tih lehkhabu a tlangzarh bawk a ni.

Dr. C. Vanlalramsanga chuan Sawrkar in hetiang chhinchhiahna ang lehkhabu a chhuah thin te a tangkai dan leh a pawimawh dante sawiin mipuiin an hriatthiam theih nan hetiang publication te hi chanchinbua ziah tam leh thehdarh te a pawimawh a. Chutiang bawkin mithiam ten hengte hi an chhui zau leh an sawizau a tul hle niin a sawi. MPE &SS officer thar 6 te chu an hnathawh tanna turah duhsakna hlanin an thiam loh leh hriat loh te chu midang zawt zel thin turin leh policy khawih thil an buaipui dawn vangin tihsual hian thui tak nghawng a neih theih avangin kawng engkima fimkhur leh thil chik peih turin a chah a ni.

He hun hi Dr. Lalrinchhana, Director, Economics & Statistics Department in a kaihruai a, Pu Lalrikhuma Sailo, Principal Adviser, Planning & Programme Implementation Department (RDB) leh Pi Chingthanmawi Guite, Deputy Adviser cum Deputy Secretary, Planning(RDB) hnen atangin Special Lecture leh Report ngaihthlak niin, MPE&SS, 2020 Batch ten Orientation Programme Feedback sawina hun an nei bawk a. Pu Lalramsanga, IRS, Additional Secretary, Planning Department chuan lawmthu sawiin hun a khar a ni.

Orientation Programme chhung hian Governor, Chief Minister leh Vice Chairman, State Planning Board te an hmu a. Training Session 27 neih niin Resource Persons 16 ten Lecture an pe a, Resource Persons te hi Planning Department chhunga officer te vek hman an ni.

Annual Report of Births & Deaths, 2019 tarlan danin 2019 chhung khan Mizorama nausen piang 23808 an awm a, mitthi 6606 an awm a, thi sa a piang (Still birth) 83 an awm bawk a. Mizoram population atanga chhutin Birth Rate hi za zelah 18.05 niin Death rate hi za zelah 5.01 a ni.