Vawiin khan Mizoram Primary School Teachers Association hruaituten School Education Minister Pu H.Rohluna chu a office-ah hmuin School Education Department tana hma a lakna kawng hrang hrangah lawmthu an hrilh a. Aizawl-ah Education centre sak tur te, Lunglei leh Serchhip-ah hetiang bawka hmalakna a kal mek te, Mid-day meal-ah sum harsa tak kara State Matching share ngaihtuah a ni te, tun hnaiah zirtirtu thahnem tak la thar a, indaih lohna hmuna dah an ni te, SSA ah Deputy State Project Director leh Dy DPC atana Primary School zirtirtu dah an ni te chuan an lawmna a tisang hle a, sorkar-in Primary School zirtirtute a ngaihsakna chuan khawtlangah an zahawmna a keng thar leh dawn nia an hriat thu te an sawi.

MPTA hruaituten chuan School session thar atanga School tan hun sawn hma tur chu tha an tih thu leh thla hnih thum chu buai deuh mah se, a hnuah fel taka a kal theih mai an beisei thu Minister an hrilh.

He hunah hian School Education Minister Pu H.Rohluna chuan thusawiin hun reilote an chan chhunga School Education Department-in hlawhtlinna a neihte chu Chief Minister leh Finance Minister-in zirna an ngaih pawimawh vang te, Parliamentary Secretary Pu Joseph Lalhimpuia tawiawm thatna leh finchhuahna rah te leh Department chhunga thawktute inpekna rah chhuah anih thu a sawi a. Zirna hi hnam rohlu a ni a, kan hnam damkhawchhuahna chu Education hi a ni tih kan hotuten an hrechiang a, Parliamentary Secretary-in a ngaihna a hre bawk a, a tul ang ang a lo bawhzui a, kum khat chhungin kawng tam takah a hlawhtlinna kan hmu a ti.

Zirna siamthat kawngah vawi leh khata tih mai theih anih loh thu te thawktute inpeknaah thui tak a innghah thu Minister chuan a sawi a. Service association ten tan hun hman dikah leh zirtir hnaah te tan lak thar a tul thu a sawi bawk.

School Education Minister hi Parliamentary Secretary Pu Joseph Lalhimpuia’n a tawiawm a. Pu Joseph Lalhimpuia chuan School tan hun sawn hma turah study group ten an zir chiannaah chuan point tam tak zingah mi thenkhatin an sawilan fo khawpuia traffic tawt tihthawlna lam a lang lova, kawng hrang hranga hlawk zawk tura an ngaih avangin sorkar-in thutlukna a siam niin a sawi. Tun hnaia zirtirtu 150 an lak tharah Aizawl-ah pakhat chiah a awm a, a dang zawng chu an awmna district-ah zel dah an ni tih a sawi a. Hetianga ti tur hian huaisen taka kal a ngai a ni a ti.