1347/2023-2025 

Aizawl, the 2nd August 2023: Vawiin chawhma khan Mizoram Rural Bank Chairman thar  Pi Sheryl L. Vanchhong chuan Governor Dr. Hari Babu Kambhampati chu Raj Bhavan-ah  a hmu a. He hunah hian Mizoram mipui ten awlsam leh tangkai zawka Bank an hman theih dan tur te, Bank Branch la awmlohna hmuna Banking service pek theih dan tur te an sawi dun a ni.  

Mizoram Rural Bank chu Mizoram chhunga Bank inzar pharh zau ber anih avangin kawng hrang hranga midangte tana awlsamna thlen thin tu anih thu Larsap chuan a sawi a. Nitina eichawp zawng te leh khawsak harsa zawkte dinhmun khaichhuah a nih theihna tura Sawrkar laipuiin ruahmanna a siamte nasa zawka tihhlawhtlin a pawimawh thu leh chungte chu Sawrkar Department hrang hrangte leh Bank tangkawpin tihhlawhtling thei se a duh thu a sawi a. MRB chu ram hmasawnna thlentu leh chumi atana thawktu pawimawh tak ni zel turin duhsakna a hlan nghal a ni. 

MRB Chairman pawhin an hmalak mekna leh an thlen chinte a tarlang a. Sawrkar laipuiin a ngaih pawimawh em em PMJDY Account chu Branch zawng zawngin an hawnsak theih thu te, khawl hmang uar tura inzirtirna (digitization initiative) ah pawh a thawhhlawk ber Bank an nih thu te, mipuite mamawh phuhru zel tura an Bank an inhawn thu te a tarlang bawk. Larsap in rawtna a lo siamte pawh a remchan ang zela tihhlawhtlin an tum tur thu a sawi bawk a ni. 

MRB Chairman hi Pu Samuel L, Warbah, General Manager, Pi Lalnunsangi, Manager (FI) leh Pu C. Laldampuia, Liaison Officer ten an tawiawm a ni.